Qazaqstanda TikTok áleýmettik jelisindegi tikelei efir barysynda balaǵat sózder qoldanǵan eki azamat ákimshilik jaýapkershilikke tartyldy. Bul derekterdi politsiia áleýmettik jelilerge júrgizilgen monitoring kezinde anyqtaǵan, dep habarlaidy dalanews.kz.
Shymkent qalasynda Qyzylorda oblysynan shyqqan 23 jastaǵy azamattyń tikelei efirde beiádep sózder aitqany belgili boldy. Jinalǵan materialdar sotqa joldanyp, nátijesinde ol ákimshilik quqyq buzýshylyq jasaǵany úshin kináli dep tanyldy. Sot sheshimimen azamat 7 táýlikke qamaýǵa alyndy.
Osyǵan uqsas jaǵdai Qyzylorda qalasynda da tirkelgen. TikTok-ta tikelei efir ótkizgen 39 jastaǵy turǵyn birneshe ret boǵaýyz sóz qoldanǵan. Sot ony ákimshilik jaýapkershilikke tartyp, aiyppul tóleýge mindettedi.
Politsiia ókilderi áleýmettik jelilerde jariialanatyn kontentke de qoldanystaǵy zań talaptary tolyq kólemde taralatynyn eskertti. Qoǵamdyq tártip pen ádep normalaryn buzatyn áreketter úshin zań aiasynda jaýapkershilik qarastyrylǵan.
Sonymen qatar quqyq qorǵaý organdary blogerler men strimerlerge qarsy arnaiy reid nemese naýqan júrgizilip jatqanyn joqqa shyǵardy. Politsiia málimetinshe, mundai quqyq buzýshylyqtardyń kóbeiýine keibir qoldanýshylardyń qaralym men aýditoriia jinaý maqsatynda arandatýshylyq sipattaǵy kontent jariialaýy sebep bolyp otyr.
