Áleýmettik jelide máslihat depýtattaryna qatysty qyzyq video tarady. Depýtattarǵa halyq aldynda ózin qalai ustaý kerek ekeni jóninde keńes berilgen. Iaǵni "qalai milliarderden millioner" bolyp kóriný joldary aitylady, - dep habarlaidy Dalanews.kz.
egovpress Telegram-arnasy bul týraly bylai jazdy: "Bizde ǵana máslihattyń súiikti depýtattary úshin halyq aldynda qalai qarapaiym kóriný kerek ekeni týraly seminarlar ótkiziledi. Bylaisha aitqanda, milliarderlerge ózin millioner retinde ustaýdy úiretedi. Qazaqstandaǵy eń tanymal partiianyń logotipine nazar aýdarmańyz".
Azattyq radiosy málimetinshe, bul video Almaty oblysynda túsirilgen. Depýtattarǵa pr mamany áleýmettik jelide qalai jumys isteý kerek ekeni týraly seminar ótkizgen. Odan bólek saǵat, kostiým, saqina sekildi elementterge de kóńil bólgen.
"Ana úiler qirap jatyr. Range Rover-men kelseń, negativ qoi. ...Jambyl aýdany bar ma? Sonda ákimderdiń sailaýynda Land Cruiser-men júrgen. Ý-shý boldy ǵoi. ...Range Rover-men barsaq, qabyldamaidy ǵoi. Sondyqtan avtokólikterge kóńil bólý kerek", - deidi videodaǵy adam.
Bul jait áleýmettik jelide qyzý talqyǵa tústi.
"Sonda “Tyǵyp je, elge kórsetpe” dei me, maqsaty ne?", "Urlańdar, biraq halyqqa kórsetpeńder ma degeni?", "Halyq aqymaq, jai kólik minip barsa, galstýksyz barsa, birnárse ózgere me? Odan da piǵyl nietterińdi halyqqa qarai týralańdar dep úiretsin", - dep jazdy olar.
