Terrakt jasap, qyz zorlap, adam óltirgen joq - Aıgúl Orynbek qyzylordalyq belsendige arasha tústi

Saǵynysh Sardarova 11 naý. 2024 13:21 12915

Birneshe jyl buryn Qyzylorda oblysynyń eks-ákimi Gúlshara Ábdiqalyqovaǵa "hannyń qyzy" degen turǵynnyń ustalýy qoǵamda narazylyq týǵyzdy. Kópshilik onyń kópbalaly ana ekenin basa aıtyp, balalardyń kózinshe mundaı jaıt bolýy zańsyzdyq dep sanaıdy. Bul máselege QR Prezıdentiniń janyndaǵy Ulttyq qoǵamdyq senim keńes múshesi, quqyq qorǵaýshy, zańger Aıgúl Orynbek te áleýmettik jelidegi paraqshasynda ún qatty, - dep habarlaıdy Dalanews.kz.

Aıgúl Orynbek zańger retinde belsendi qandaı da bir qylmys jasasa, oqıǵa ornynda ustalýy kerek degen pikirde.

"Bizdiń eldegi Áıel adamǵa degen "qurmetti" osy sýretten-aq anyq kórýge bolady! Dál mereke kúnine oraı qoǵam aldynda aýyl-aımaqtaǵy zańsyzdyqtardy aıtyp, áshkerelep júrgen názik jandy álsiz áıeldi bulaı tutqyndaý - durys emes! Iá, kópshilik qaýym: "Sandýǵash dóreki, keı kezde shekten shyǵatyn sózderi de bar" dep jatyr... Biraq bes balanyń anasyn kishkentaı balalarynyń kózinshe esikti buzyp alyp ketý, bul - durys emes.

Balalardyń psıhıkasyna áser etedi dep oılamaısyńdar ma? Eger ol aqshaǵa bopsalasa, aqshany alyp jatqan jerinen-aq ustaýǵa bolar edi ǵoı?! Oqıǵa ornynda, qylmys jasaý ústinde quryqtalsa - onda esh daý joq Myna qoǵam da, jurtshylyq ta daýryqpas edi…! Narazylyǵyn bildirmes edi!" - deıdi ol.

Sonymen qatar, ol bul oqıǵa adam quqyǵyn buzý ekenin aıtyp, ashyq aıyptady.

"A", "B" degen adamdardan aryz tústi eken dep júgirip kelip, jekeniń menshigindegi aýmaq, ondaǵy esikti buzyp kirip, qamaýǵa alý, bul - zańsyz! Zańger retinde, men bul jaıtty - Adam quqyǵyn óreskel buzý deregi dep esepteımin! Qazaqstandaǵy quzyrly organdarǵa mynany eskertkim keledi: El Prezıdenti Q.K.Toqaevtyń ózi qatań tapsyrǵan quqyqtyq memleketti shyn quryp, ony qalyptastyrǵymyz kelse - onda bizde eń aldymen Adam quqyǵy qorǵalýy kerek!

Kúdiktiniń ózin resmı túrde Polısıa departamenti nemese bólimine shaqyryp úırený kerek! Jemqorlyq jaıtyn jáne qylmys ústinde tikeleı bultartpas aıǵaqpen ustalmasa, jáı kúdikke ilikken adamdy bas salyp qamap, azaptap, ony qorlaý arqyly qylmysty moınyna ilýdi doǵaratyn ýaqyt jetti!

Ata Zańymyz - Konstıtýsıamyzdyń 1-babynda da memlekettiń basty qazynasy - Adam jáne onyń quqyqtary men bostandyǵy ekeni aıqyn kórsetilgenimen, is júzinde bizde adam quqyǵy dál ıttiń quqyǵyndaı qorǵalyp jatqan joq!

Qaıda barsań da, Qazaqstannyń qaı bóligine, aýyl-aımaǵyna burylsań da - quqyǵy aıaqqa taptalǵan Halyqty kóresiń… Azar da bezer bolyp ashynǵan Halyq basqadan buryn myna formadaǵylardan kórgen zábir-zańsyzdyqtaryn jetkize almaı júr… Ókinishke qaraı, bul áli de jalǵasyp jáne órship jatyr! Halyqtyń quqyǵy taptalǵany - taptalǵan! Ashshy bolsa da aqıqaty - osy!

Artýr Lastaev myrza, Siz shet el kórgen azamat retinde jáne Adam quqyǵyn qorǵaıtyn ombýdsmen retinde Sandýǵashtyń isine quqyqtyq baǵa berińizshi! Zań aıasynda qandaı sharalar qabyldap jatyrsyz? Sol jumystardy Eldiń aldynda ashyq usynýdy jáne kórsetýdi suraımyn!

Ol terrakt jasap, qyz zorlap, adam óltirgen joq! Esirtki satyp, adam saýdalǵan joq! Aıǵaqtyq dálelder tolyq jınalmaı jatyp, ústinen aryz tústi dep, dereý alyp ketip, qamaýǵa alý - bizdiń Konstıtýsıamyzǵa syn emes pe?", - dep jazdy zańger.

Al óńirlik polısıa málimetinshe, azamattar belsendiniń ústinen shaǵym túsirgen.

"28 aqpan jáne 6 naýryz kúnderi Qyzylorda oblysynyń polısıa departamentine oblystyń eki turǵyny júgindi. Olar osy azamatshany qylmystyq jaýapkershilikke tartý jóninde aryzdanǵan. Turlybekova bopsalaý arqyly jáne ar-namys pen qadir-qasıetke nuqsan keltiretin málimetterdi taratamyn dep qorqytyp, jábirlenýshilerden iri kólemde aqsha talap etken. Bul derek boıynsha qylmystyq is qozǵaldy. Turlybekova aýyr qylmys jasady degen kúdikke ilinip otyr. Budan bólek taǵy birneshe bopsalaý faktileri anyqtaldy.

Proseske qatysýshylardyń jaýabyn burmalaýǵa yqpal etip, tergeýdiń jan-jaqty júrgizilýine kedergi keltirýi múmkin. Osyǵan baılanysty tergeý soty ony kúzetpen ustaý sharasyn sanksıalady. Ustaý zań sheńberinde júrgizildi. Arnaıy quraldar men jaýyngerlik ádister qoldanylǵan joq. Kúdikti ýaqytsha ustaý ızolátoryna qamaldy. Tergeý múddesi úshin ózge aqparat jarıa etilmeıdi", - dep jazǵan Jańaqorǵan aýdandyq polısıa bólimi ókilderi egemen.kz-ke.

Aıta keteıik, birneshe kún buryn áleýmettik jelilerde belsendi ustalǵan sát kórinetin sýret tarap ketti. Jeli qoldanýshysynyń bul jazbasyna qalalyq Polısıa departamenti ókilderi pikir bildirdi.

"Bul derek boıynsha Qyzylorda oblysynyń Polısıa departamenti qylmystyq is qozǵap, tergep-tekserý áreketterin júrgizip jatyr. Ózge de aqparattar tergeý qupıalyǵyna baılanysty jarıa etilmeıdi", - dep jazylǵan jaýapta.

Osy jaıtqa qoǵam belsendisi Qural Seıithanuly da ún qatty. Onyń sózinshe, óńir turǵyny Sandýǵash Turlybekova - bes bala ósirip otyrǵan jalǵyzbasty ana.

"Sandýǵash - bes balasy bar jalǵyz ilikti ana. Endi óz narazylyǵyn áleýmettik jelige shyǵarǵany úshin de qylmystyq jaýapkershilikke tarta beredi me? Alaıaqtardy nege osylaı ustamaıdy eken?" - dep jazdy ol.

Al Gúlshara Ábdiqalyqova men ustalǵan áıelge qatysty oqıǵa osydan shamamen 4 jyl buryn boldy. Sol kezde Qyzylorda oblysynyń ákimi bolǵan Gúlshara Ábdihalyqova Jańaqorǵan aýdanyna jumys saparymen barǵan edi. Polıseıler ákim keledi dep joldy jaýyp, basqa kólikterdi júrgizbeı qoıǵan.