Politsiia aqparatyna sáikes, oqiǵa 13 maýsym kúni bolǵan. Ulttyq testileý ortalyǵynyń qyzmetkerleri UBT-ǵa jalǵan qujatpen qatysqan túlekterdi anyqtady.
«Tergeý kezinde jalǵan jeke kýálik jasaǵan 22 jastaǵy kúdikti ustaldy. Qylmystyq kodekstiń 385-baby 1-bóligi boiynsha qylmystyq is qozǵaldy», - dedi politsiia departamentinde.
Ulttyq testileý ortalyǵynyń eks-direktory Didar Smaǵulov Azattyq Rýhy tilshisine bergen suhbatynda birneshe derekti aityp ótti. UBT barysynda tirkelgen zań buzýshylyqtar týraly málimetterdi Didar Smaǵulov 15 maýsymda, iaǵni oqiǵa bolǵan kúni jariialaǵan.
«Men bul aqparatty biz anyqtaǵan soń birden jariialadym. Bilim jáne ǵylym ministriniń sybailas jemqorlyqqa qarsy is-qimyl máseleleri jónindegi shtattan tys keńesshisi retinde men testileý ortalyǵynan ketsem de, qandai da bir sybailas jemqorlyq kórinisterine jol bermeý úshin onyń jumysyna jetekshilik etýdi jalǵastyrdym.
Bul jaǵdai 15 maýsymda boldy. Biz UTO qyzmetkerleri ony óz kúshimizben anyqtadyq. Shynymdy aitsam, men jazbany qoǵamnyń nazaryn osy jaǵdaiǵa aýdarý, ashyqtyqty qamtamasyz etý, eshqandai qysym jasamaý úshin jazdym. Iaǵni, men sol kezdiń ózinde bedeldi adamdardyń qatysy bolǵandyqtan, qoǵamnyń nazaryn aýdarý kerek dep oiladym», - deidi Didar Smaǵulov.
Sondai-aq UTO eks-direktory Tursynbek Qabatovtyń qyzynyń ornyna kirgen Symbat esimdi boijetkenge qatysty faktilerdi aityp ótti.
«Onda 4 adam boldy, olardyń arasynda bul qyz da boldy. Tórt adamnyń ornyna basqa adamdar kirdi. Barlyq 8 adam UBT-ǵa tirkeldi, iaǵni olar aldymen óz qujattary boiynsha, sodan keiin sáikestendirýdiń ekinshi kezeńinde, kompiýterdiń janynda otyrǵan adamnyń kýáligi tekserilgen kezde, olar kýálikti ózara aýystyrýǵa tyrysty. Árine, bul zań buzýshylyq anyqtaldy. Qujattardy qoldan jasaý faktisin anyqtap, biz birden politsiia shaqyrdyq. Materialdardy tártip saqshylaryna tapsyrdyq», - deidi Didar Smaǵulov.
Zań buzýshylyqtar týraly málimetterdi jariialaǵan advokat Tursynbek Kabatovtyń qyzy jazadan qutylady dep qorqady. Didar Smaǵulov ta mundai pikirdi joqqa shyǵarmaidy.
«Men mundai múmkindikti joqqa shyǵarmaimyn. Muny jariialaǵan advokattyń pikiri durys shyǵar dep oilaimyn. Men tergeý materialdarymen tanys emespin, biraq tek osy adam jaýapqa tartylady degen boljam bar. Iaǵni, osynyń barlyǵyn uiymdastyrýshy adam ǵana jazaǵa tartylýy múmkin», - deidi ol.
Al bul zań buzýshylyqty uiymdastyrǵan kisi kim degen suraqqa UTO eks-direktory bylai jaýap berdi:
«Uiymdastyrýshy naryqta qyzmet kórsetetin bilim berý ortalyqtarynyń biriniń basshysy. Tergeý óte jabyq boldy, tergeýshi áriptester alýǵa tyrysqan kez kelgen aqparatty berýden bas tartty. Ókinishke qarai, kúdik bar (T.Qabatovtyń qyzy jazadan qutylady degen – redaktsiia).
Sotta is qandai túrde usynylatyndyǵyn biz áli bilmeimiz, bizdi kýáger retinde sotqa shaqyrýdy kútemiz. Ókinishke qarai, UTO qyzmetkerlerin jábirlenýshi retinde emes, kýáger retinde ǵana tartady.
Biz tergeý organyna bizdi jábirlenýshi retinde tartý úshin birneshe ret aryz jazǵan edik. Ókinishke qarai, tek kýáger retinde qatysamyz. Iaǵni, bul faktilerdiń jiyntyǵy nátijesinde sotta múldem basqa sipat alyp ketýi múmkin. Biraq biz kýáger retinde ádilettilikti talap etemiz».
Tanymal zańger Abzal Quspannyń málimetinshe, satirik Tursynbek Qabatovtyń qyzy Ádemi Amanǵalidyń ornyna UBT-da test tapsyrýǵa basqa adam kirgen. Bul týraly ol óziniń Facebook-paraqshasynda jazdy.
A.Quspan atalǵan aqparatty senimdi derekkózden alǵanyn aityp otyr. Tipti, qylmystyq is te qozǵalypty.
«13 maýsym kúni Ádemi Tursynbekqyzy Amanǵalidyń ornyna testileýge ENÝ-dyń 2 kýrs stýdenti, grantta oqyp júrgen Symbat Qanai test tapsyrýǵa kirgen. Tursynbektiń qyzy jalǵan qujat jasatqan. Aldynda Tursynbektiń qyzy sáýir, mamyr ailarynda birneshe ret test tapsyryp, tómen ball (60 balǵa jetpegen) jinaǵan. Qyzy astanadaǵy eń úzdik dep tanylǵan mektepti Altyn belgige bitirgen. Testileýge kirý barysynda barlyq testilenýshiler, Tursynbektiń qyzynyń ornyna basqa tulǵanyń jalǵan qujatpen kirgenine kýá bolǵan. Qazirgi kezde qylmystyq is qozǵaldy, alaida Tursynbektiń qyzy qutylyp ketedi dep otyrmyz. Óitkeni jalǵan qujatty daiyndaǵan adamdy ǵana kináli dep tanyp otyr», - delingen zańgerdiń paraqshasyndaǵy jazbada.
