"Rýblmen tabys tabatyn reseilik, sol sekildi keibir otandyq kompaniialar aldymen jappai teńge satyp alady, sodan soń dollardy satyp alýǵa kóshýde. Menińshe, Qazaqstandaǵy qor birjasyndaǵy saýda-sattyqtyń joǵary kólemi osymen bailanysty". Osylai degen ekonomist Rasýl Rysmambetov Ulttyq bank pen Úkimet aldynda sheshýi tiis kúrmeýi qiyn úlken másele turǵanyn aitady, dep habarlaidy Dalanews.kz.
"Qazir olar kez-kelgen baǵada dollar satyp ala beredi, óitkeni bul dollardy reseilik taýarlarǵa aiyrbastaý óte tiimdi bolyp tur. Osylaisha olar Qazaqstandy iri aqsha aiyrbas ornyna ainaldyrýda", dep jazady Rasýl Rysmambetov ArtFinanz Telegram arnasynda.
Ol qarasha aiynyń sońynda Resei Federatsiiasyna shetel valiýtasy túrindegi túsimniń basty kóziniń biri bolyp kelgen "Gazprombankke" qarsy sanktsiialar engizilgennen keiin jaǵdai kúrdelene túskenin eske salady.
"Mosbirjada dollarmen saýda-sattyq jasaýǵa tyiym salyndy. Sondyqtan rýblge shaqqanda dollar quny ózgere beredi, 100 rýbl deisiz be, 1000 rýbl deisiz be, báribir. Óitkeni olarda dollar joq. Reseidiń iskerlik qaýymy shetel valiýtasy tapshylyǵy qylań bergenin jaqsy túsinip otyr", - deidi ekonomist.
Sondyqtan, eń birinshi kezekte, Resei tarapynan dollarǵa degen suranys qatty bolyp tur.
"EAEO-ny esepke almaǵannyń ózinde Reseimen biz belsendi túrde saýda-sattyq júrgizemiz. Sondyqtan reseilik taýarlardy satyp alý arnasyn jabý – aqylǵa qonymsyz. Endeshe reseilik naryqtaǵy dúrbeleń aqsha baǵamy men infliatsiia arqyly bizge kelip jete beredi. Teńge baǵamy rýblge bailanbaǵan, tek Qazaqstan men Resei ekonomikasy – kórshiles, aralas-qoralas degendei. Sondyqtan olarda bolyp jatqan oqiǵalardyń yqpalynan biz jaltara almaimyz. Sol sebepti endi Ulttyq bank pen Úkimet sheteldikterdiń bankter arqyly shańsorǵysh qusap "Qazaqstannan valiýtany" sora bermes úshin erekshe sharalar qabyldaýǵa májbúr bolady, – deidi sarapshy.
Osy jaǵynan alǵanda,mamannyń aitýynsha, Tramp biliktiń basyna kelip, Ýkrainadaǵy soǵys máselesin sheshkenge deiin qyrýar resýrs shyǵyndalaiyn dep turǵan sekildi.
Aita ketsek, búgingi tańda Qazaqstanda 23 myń reseilik kompaniia jumys isteidi, onyń 4 myńy sońǵy jyldary ashylǵan. Kórshi eldiń iskerlik ortasynyń jyly ornyn sýytyp, údere kóshýine sanktsiia túrtki ekeni anyq.
