– Barshańyzdy alda kele jatqan elimizdiń Táýelsizdik kúni merekesimen shyn júrekten quttyqtaımyn. Bul qazaq eliniń jahanǵa tanylǵan, barlyq ıgilimizdiń bastaýy bolǵan eń basty merekemiz. Sizder osyndaı aıtýly kún qarsańynda joǵary marapatqa ıe bolyp otyrsyzdar. Bul jeke azamattar arqyly barsha halqymyzdyń istegen eren eńbegine degen baǵa. Kez kelgen el jurttan eren ónerimen, máıekti mádenıetimen erekshelenedi. Bul rette talantty týyndy tutas ulttyń rýhanı qazynasyn baıyta túsedi. Osyǵan oraı búgin ádebıet pen óner salasyndaǵy memlekettik syılyqtardy tapsyrǵaly turmyz. Aqordanyń tórine jınalǵan barshańyz úshin bul erekshe mereıli sát dep bilemin. Qýanyshtaryńyz qutty bolsyn, – dedi Elbasy.
Qazaqstan Prezıdenti Táýelsizdik kez kelgen eldiń baǵa jetpeıtin eń qasterli qundylyǵy bolyp sanalatyndyǵyn basa aıtty. «Biz azattyqtyń arqasynda aıymyz ońynan týyp, tórtkil dúnıege túgel tanylǵan halyqpyz. Shırek ǵasyrda el esinde qalatyn ulǵan-ǵaıyr ister atqardyq. Osy jyldardaǵy barlyq jetistikter árbir qazaqstandyqtyń eren eńbeginiń nátıjesi bolyp tabylady. Sonyń ishinde, búgingi marapat ıeleriniń árqaısysynyń buǵan qosqan úlesi orasan zor dep sanaımyn. Sizder ónegeli isterińizben ózgelerge úlgi bolyp, kópshilik qurmetine bólenip kelesizder», – dedi Nazarbaev.
