Sharada Darkhan Juzz atymen tanymal bolǵan qazaqstandyq mýzykant Darhan Júnisbekovtyń «Aue» albomy «Úzdik albom» atandy. Júlde ánshiniń otbasy múshelerine tabystaldy. «Aue» - «Ozen» mýzykalyq leibliniń qoldaýymen jaryqqa shyqqan ánshiniń aiaqtalmai qalǵan jobasy.
Odan bólek, Marhaba Sábidiń «Tym bólek» áni «Úzdik án», Aqerke Amaliattyń oryndaýyndaǵy Erbolat Qudaibergenovtyń «Men qazaqpyn» áni televiziialyq júldeniń «Úzdik kaver» atalymyn ielendi.
«Úzdik oryndaýshy» nominatsiiasy «Tumandaý» áni úshin ánshi Airige jáne «Asyqpa» áni úshin Mona Songz atymen tanymal otandyq ánshi Manarbek Jumataiǵa berildi.
«Ninety One» toby júldeniń «Úzdik top» atalymy boiynsha marapattaldy. «Bári óz qolyńda» qazaqstandyqfilminiń saýndtregi – Miras Júginisovtyń oryndaýyndaǵy «Saiahat» áni «Úzdik saýndtrek» atalymy boiynsha daýys berýshiler yqylasyna ie boldy.
«Orda» tobynyń múshesi, ánshi, prodiýser Erbolat Bedelhan men «Ozen» mýzykalyq leibliniń negizin qalaýshy Aizatýlla Hýssein uiymdastyrýshylar tarapynan júldeniń «Qazaqstan zamanaýi mýzykasynyń damýyna qosqan úlesi úshin» jańa atalymy boiynsha marapattaldy.
Jeńimpazdardy anyqtaý «BEU» radiosynyń tyńdarmandary arasynda áleýmettik jelilerde daýys berý arqyly júrgizildi. Júlde maqsaty – qazaq zamanaýi mýzyka ókilderi arasynda túrli janrlar men stildi tanymal etý. «Qazaqstan» teleradiokorporatsiiasynyń beinemuraǵatynda dástúrli jáne zamanaýi án ókilderiniń «Altyn qory» saqtalǵan. Al «BEU» radiosynyń fonotekasynda zamanaýi mýzyka ókilderiniń 3000-ǵa jýyq týyndysy bar.
Jobanyń televiziialyq nusqasy jýyrda «Qazaqstan» arnasynyń efirinen kórsetiledi.
