Tanymal ánshi úiin jóndetip alyp, qurylysshylardy qurqol aidap shyqqan
Tanymal M. degen ánshiniń úiine kúrdeli jóndeý jasatyp alyp, qurylysshylardy qurqol aidap shyqqany, álem chempiony S. degen sportshy sylaqshy kelinshekterdiń aqysyn tólemei qoiypty. Ózin elge tutqa sanaityn bir dókei jas kómekshisin eki jyl boiy emeksitip janynda ustap, aqyry siyrquiymshaqtatyp aqysyn bermei qýyp jibergen. N. degen kásipker jigittiń eki qabatty úiin saldyrtyp alyp qurylysshylarǵa aqshasyn bermei zar qaqtyrǵany siiaqty jaǵdaiattar el ishinde kóp.
Álgindei ozbyrlyqqa kóbine daiashylar, baqtashylar, kúzetshiler, qurylysshylar, qara jumysshylar ushyrap jatady. Bul ózi keńinen tarap bara jatqan teris qubylysqa uqsaidy.
HeadHunter zertteý ortalyǵy ótken jyly 2 myńdai adamnyń arasynda onlain júrgizgen pikirterim nátijesine qaraǵanda suraý salynǵandardyń 84 paiyzy jumys izdegen nemese jumysqa turǵan kezderinde aldaý áreketterine tap bolǵandaryn aitqan.
Adam balasy dinine, ultyna, násiline qaramastan Alla aldynda da, zań aldynda da bári birdei. Asyl dinimizde «Bireýdiń eńbeginiń aqysyn jeidesiniń teri kepkenshe ber» deitin qaǵida da bar. Alla Taǵala óz aqysyn keshirgenimen quldarynyń arasyndaǵy aqyny olardyń ózderine qaldyrǵan. Aldaýǵa ushyramaý úshin jumysqa turar aldynda kelisim-shart jasalýyn talap etken de tiimdi. Bilýge tiisti nárse sol – bireýdiń aqysyn jegendi aqysy jelingen adam keshirmei Alla keshirmeidi.
Qarap otyrsańyz, bireýdiń aqysyn jegen ozbyr erte me, kesh pe ózi sonysynyń zardabyn tartqanyn kóresiń. Aitalyq, tilge tiek bolǵan álgi ánshi eki qabat úiin bankke kepilge qoiyp aqsha alyp, aqyry sol úiinen aiyrylyp qaldy.
Al N. degen kásipker úiin kazinoda utqyzdy. Aýzymen qus tistegen dókei insýltke ushyrap arbaǵa tańyldy. Chempion isti bolyp, temir torǵa toǵytyldy. «Bul dúnieniki o dúniege ketpeidi» degen osy!
Sondyqtan kisi aqysyn jep qarǵysqa qalmaiyq, aǵaiyn!
Marat Báidildaulynyń (Toqashbaev) Feisbýktaǵy jazbasynan
