Sot Jetisý prokýrorlarynyń Taldyqorǵandaǵy "Ardagerler saiabaǵy" jerlerin memlekettik menshikke qaitarý týraly talap aryzyn qanaǵattandyrdy, dep habarlaidy Dalanews.kz.
Sot Taldyqorǵan qalasy prokýratýrasynyń «Ardagerler saiabaǵynyń» 74 gektar jerin jeke tulǵaǵa berýdi zańsyz dep taný jáne olardy memleket menshigine qaitarý týraly talap aryzyn qanaǵattandyrdy.
Prokýrorlar jalpy paidalanýdaǵy orman saiabaǵy aimaǵyna jatatyn ýchaskeniń 2004 jyly jeke tulǵaǵa zańsyz ielikten shyǵarylǵanyn anyqtaǵan (Jer kodeksiniń 26-baby buzylǵan).
Keiinnen, jańa jer iesi elitalyq kottedjdik qalashyq salýdy kózdep, onyń paidalaný maqsatyn ózgertken. Sol úshin saiabaq aýmaǵy 240 ýchaskege bólingen.
Sot sheshimi áli zańdy kúshine engen joq.
Prokýratýra zańnyń saqtalýyn qamtamasyz etý, memlekettik jáne qoǵamdyq múddelerdi qorǵaý jumystaryn turaqty negizde júrgizedi.
