Búgin Taldyqorǵan qalasynda jańa drama teatrdyń qazyǵy qaǵyldy. 510 orynǵa arnalǵan zamanaýi úlgidegi 3 qabatty mádeniet oshaǵy qalanyń jańadan boi kóterip kele jatqan Ońtústik-Batys aýdanynda ornalaspaq. Ǵimarattyń qaǵyzyn qaǵyp, kapsýlasyn salý rásimin oblys ákimi Amandyq Batalovpen birge Qazaqstannyń halyq ártisteri, belgili teatr jáne kino akteri Dosqan Joljaqsynov, talantty rejisser Talǵat Temenov, teatr ártisi Almahan Kenjebekova, sonymen qatar kinoakter Álimǵazy Raiymbek atqardy, dep habarlaidy Almaty oblysy ákiminiń baspasóz qyzmeti.
Jetisýlyq ónersúier qaýymdy aitýly oqiǵamen quttyqtaǵan oblys ákimi Amandyq Batalov Elbasy Nursultyn Ábishuly Nazarbaevtyń ónerge degen zor qamqorlyǵynyń arqasynda osy ǵimaratty salýǵa qol jetkizilip otyrǵanyn atap ótti.
– Táýelsizdiktiń 25 jyldyǵynda Taldyqorǵannyń jańa shaǵyn aýdanynda qurylysy júrip jatqan Saltanat saraiynyń, Kórme pavilonynyń janynan osy ǵimarattarǵa sáýlettik jaǵynan úilesimi mol jańa drama teatry da salynbaqshy. Akýstikasy, sahnasy, akterler bólmesi, teatr ǵimaratynyń ózine ǵana tán basqa da erekshelikteriniń barlyǵy da eskerilip, teatr barlyq parametrlerge sai, joǵary talǵammen jasalatyn bolady.Óner qamqorlyq jasaǵanda ǵana ósedi. Mádeniet pen ónerimiz órkendep, óse bersin, jańa salynatyn teatr Jetisý halqynyń qýanyshyna qyzmet etsin, - dedi oblys ákimi A. Batalov.
- Qazaqstanda jalpy sany 54 teatr bolsa, sonyń 18-i jańa teatr dep esepteledi. Biraq arnaiy laiyqtap salynǵan ǵimaratta otyrǵan teatrlar neken-saiaq. Sonyń biriniń irgesi kún sanap kórkeiip, keipi adam tanymastai ózgerip, ósip kele jatqan Taldyqorǵanda qalanyp jatqanyna sizdermen birge qýanyp turmyz. Jańa teatrdan jańa talanttar ósip shyǵyp, óner ujymy halyqtyń igiligine jumys istei berýine tilektespin, - dedi Talǵat Temenov.
B. Rimova atyndaǵy teatrdyń akteri Almahan Kenjebekova osydan 41 jyl buryn qazirgi teatrǵa jas maman bolyp kelgenin, endi tájiribesi tolysqan shaqta jańa teatrda jumys isteý baqytyna ie bolatynyn qýanyshpen jetkizdi.
Á. Raiymbekov aqsaqaldyń batasynan keiin saltanatty jaǵdaidy teatrdyń kapsýlasy salyndy.
Jalpy, teatr qurylysynyń quny 4 mlrd.-qa jýyq teńge. Qurylys jumystaryn BI Group kompaniiasyna qarasty «Ónerkásip qurylys» JShS júrgizedi. Ǵimarattyń jalpy aýdany 10 myń sharshy metr. Qurylystyń aiaqtalý merzimi 2018 jyldyń maýsym aiyna josparlanyp otyr.
