Bul baıqaý oblys boıynsha tuńǵysh ret múmkindigi shekteýli jandar arasynda jýrnalıs Sandýǵash Dúısenovanyń uıymdastyrýymen ótip otyr. İs-sharanyń negizgi maqsaty múmkindigi shekteýli jandardyń mańyzdy máselelerine kásipkerlerdiń nazaryn aýdartý, ónerge degen ynta-yqylasyn arttyra otyryp, ómirge degen kózqarastaryn qalyptastyrý.
– Biz osy saıysty kúndelikti turmys-tirshiligi birdeı ótip jatqan jandarǵa arnadyq, ıaǵnı múgedektigi bar adamdarǵa. Osy baıqaýdy ótkizbeı jatyp, jan-jaqtan kóp izdendik. Bul máselege beıjaı qaramaıtyn, shynaıy izgi nıetterin bildirip jatqan adamdar sanynyń kóptigin baıqadyq. Sondyqtan da ómirge «Ózgeler» atty joba dúnıege keldi. Oǵan qatysýshylardyń barlyǵy da óte ónerli ekeniń kórermenderge dáleldeı bildi, – deıdi baıqaý uıymdastyrýshysy Sandýǵash Dúısenova.
«Ózgeler» saıysyna irikteý bir aı buryn jarıalanǵan. Osy ýaqyt ishinde 20-dan asa adam qatysýǵa nıet bildiripti. Tórt kezeńnen súrinbeı ótken ony fınalǵa joldama alǵan. Olar sheshýshi synda «Úzdik hanzada, hanshaıym» ataný úshin barynsha tyrysyp baqty. Baıqaýdyń bir ereksheligi qazylar alqasy ádettegideı tanymal tulǵalar emes. Qatysýshylarǵa baǵa berer ádil top qatarynda mektep oqýshysy, stýdent, qarapaıym jumysshy da bar.
Aıta ketý kerek, bul bastamany jergilikti atqarýshy organdar, isker áıelder qaýymdastyǵy, sulýlyq salondary men mesenattar qoldap, ár qatysýshyǵa jeke kıim úlgilerin de tigip bergen.
– Búginde, árıne, barlyq áleýmettik nysandarda pandýstar bar. Alaıda
ókinishke oraı, shaǵyn jáne orta bıznes túri meıramhanalar, kafeler, shashtarazdar, kınoteatrlar múmkindigi shekteýli adamdarǵa qol jetimdi emes. Bolashaqta qatysýshylar aýdandarda iriktelinip, oblystyq konkýrsqa joldama alatyn bolady, – dep qosty S.Dúısenova.
Bala kúnnen baldaqqa súıenip kelgen Mıra Altaeva úshin bul kún tarıhı sátke aınaldy. Ómirinde alǵash ret sahnaǵa shyǵyp óner kórsetti. Erkin júrip tura almasa da, eńbekten qol úzgen emes. Búginde bútindeı bir otbasynyń aıaýly jary, asyl anasy. Al, bul baıqaý onyń múmkindigin odan ary arttyrypty.
«Buryn-sońdy baıqaýǵa qatyspappyn. Búgin birinshi ret sahnaǵa shyǵýym. Saıystyń ótetinin áleýmettik jelide kórip qaldym. Sodan baǵymdy synap kóreıinshi dedim. Biz negizi kóp ýaqytymyzdy úıde ótkizgendikten mundaı sharalarǵa qatysa bermeımiz. Bul baıqaý bizge zor múmkindik berdi», –
dep alǵysyn bildirdi.
Saıys qorytyndysy boıynsha bas júlde Elmıra Smaǵulova men Syrym Kaıratbekovke buıyrdy. Al, kórermenge ózgeshe bıimen áser syılaǵan Nurbolat Qasabekov pen Mıra Altaeva keshtiń hanzada hanshaıymy atandy. Basqa da qatysýshylarǵa alǵys hatpen marapattalyp, arnaıy syılyqtar tabys etildi. Ádemi de áserli kesh munymen aıaqtalǵan joq. Baıqaýda hanzada atanǵan Nurbolat Qasabekov sahna tórinde bolashaq jaryna usynys jasady.
Baljan Qaıratqyzy, Almaty oblysy
