Qazaqstanda "Iandeks Taksi" júiesinde baǵaǵa áser etýi múmkin qaýipter anyqtaldy. Bul týraly Básekelestikti qorǵaý jáne damytý agenttiginiń (BQDA) baspasóz qyzmeti málimdedi, dep habarlaidy Dalanews.kz.
BQDA málimetinshe, taksi qyzmetteri naryǵyna monitoring júrgizetin jumys tobynyń kezekti otyrysy ótti. Onda taksi shaqyrýǵa arnalǵan baǵdarlamalyq-tehnikalyq keshender men (nemese) mobildi qosymshalar arqyly kórsetiletin qyzmetterdiń jai-kúii qaraldy.
“Otyrys barysynda “Iandeks Taksi”júiesindegi algoritmdik baǵa qalyptastyrý tetiginiń tiimdiligine júrgizilgen aýdittiń qorytyndylary qaraldy. Bul tekserý agenttik pen Tsifrlyq damý, innovatsiialar jáne aeroǵarysh ónerkásibi ministrligi jáne basqa da bilikti mamandardyń qatysýymen júrgizildi. Eske sala ketsek, "Iandeks Taksi" kompaniiasyna bul aýditten ótý mindeti monopoliiaǵa qarsy komplaens aiasynda júktelgen bolatyn. Aýdittiń maqsaty – “Iandeks” servisiniń jumysyn, sonyń ishinde taksi baǵasyn anyqtaýǵa áser etetin sharttar men parametrlerdi jan-jaqty zertteý edi. Bastapqy aýdit nátijesinde baǵa belgileý úderisine yqpal etýi múmkin birqatar qaýipter anyqtaldy”, — delingen habarlamada.
Agenttik atap ótken negizgi táýekelder mynalar:
• qalanyń shekarasy ákimshilik-aýmaqtyq shekaralarmen sáikes kelmeidi;
• baǵanyń ósýine baǵaǵa qatysy joq faktorlardyń áser etýi;
• qosymshada baǵany esepteýge qajet tolyq aqparattyń bolmaýy;
• áýejai aýmaǵynda jolaýshylardy ornalasqan jerine qarai kemsitý jáne taǵy basqa máseleler.
“Keibir táýekelder joiyldy, al qalǵandary boiynsha “Iandeks” olardy túzetýge mindetteme aldy. Máselen, agenttik jibergen eskertýge sáikes, “Iandeks Pliýs” adaldyq baǵdarlamasynyń erejeleri ózgertildi. Bul ózgeristerdiń nátijesinde atalǵan baǵdarlama boiynsha tutynýshylarǵa usynylatyn jeńildikterdiń barlyq shyǵynyn “Iandeks” óz moinyna aldy. Sondai-aq “Iandekstiń” komplaens qujatyna ózgerister engizilip, kompaniiany suranys sharyqtaityn kezeńderde taksi baǵasyn negizsiz ósirýge jol bermeýge jáne júrgizýshilerdiń tabysynyń tómendeýin boldyrmaýǵa baǵyttalǵan keshendi sharalar qabyldaýǵa mindetteidi”, — dep málimdedi agenttik.
Sonymen qatar otyrysta agenttikke kelip túsken shaǵymdar negizinde “Iandeks Taksi” júrgizýshilerin tolǵandyryp júrgen birqatar máseleler de qaraldy.
“Sondai-aq otyrys barysynda “Iandeks Taksi” ókilderiniń 2025 jyldyń birinshi toqsanyndaǵy monopoliiaǵa qarsy komplaens talaptarynyń oryndalýy jónindegi esebi tyńdaldy. Jiyn qorytyndysynda monitoringtik top memlekettik organdar men “Iandeks Taksi” kompaniiasyna qatysty birqatar usynys ázirledi”, — delingen agenttik habarlamasynda.
