Almatyda Memleket basshysy Qasym-Jomart Toqaevtyń halyqtyń ómir súrý sapasyn arttyrý jáne azamattardy qoljetimdi turǵyn úimen qamtamasyz etý jónindegi tapsyrmalaryn iske asyrý jalǵasýda. Búgin Almaty ákimi Darhan Satybaldy qala turǵyndaryna jańa páterlerdiń kiltin tabystaýdyń ekinshi kezeńine qatysty, dep habarlaidy dalanews.kz.
Ótken aida alǵashqy kezeń aiasynda 885 otbasy jańa baspananyń kiltine ie boldy. Ekinshi kezeńde jalpy sany 1832 páter tabystalady. Onyń ishinde búgin «Kenesary» turǵyn úi kesheninde 946 otbasyǵa jańa páterdiń kilti berildi. Alǵashqy eki kezeńniń qorytyndysy boiynsha 2700 almatylyq otbasynyń turǵyn úi jaǵdaiy jaqsarady. Úshinshi kezeńde taǵy 640 páter tabystalyp, odan keiin baǵdarlama tórtinshi jáne besinshi kezeńder aiasynda jalǵasady.
«Memleket basshysy Qasym-Jomart Kemeluly Toqaevtyń azamattardyń ómir súrý sapasyn arttyrý, halyqtyń ál-aýqatyn jaqsartý jáne áleýmettik ádilettilikti qamtamasyz etýge baǵyttalǵan tapsyrmalaryn oryndaý aiasynda qalamyzda turǵyn úi máselesin sheshýge erekshe kóńil bólinýde», – dedi Almaty qalasynyń ákimi Darhan Satybaldy.
Turǵyn úidi bólý barysynda jetim balalarǵa, múgedektigi bar azamattarǵa, sondai-aq erekshe qajettiligi bar balalardy tárbielep otyrǵan muqtaj otbasylarǵa basymdyq beriledi. Ekinshi kezeń aiaqtalǵannan keiin osy sanattaǵy azamattardyń turǵyn úi kezegi aitarlyqtai ilgerileidi. Sonymen qatar eńbek etetin qala turǵyndary úshin jeńildetilgen ipotekalyq nesie baǵdarlamalary jumysyn jalǵastyrýda.
Biyl «Almaty jastary» baǵdarlamasy boiynsha 5 myńnan astam ótinim qabyldandy. Jyl sońyna deiin 1650 jas almatylyq jeńildetilgen turǵyn úi nesiesin alý múmkindigine ie bolady.
«Biz úshin jańa turǵyn úi keshenderin salý – baspana turǵyzý ǵana emes, turǵyndarǵa jaily ómir súrý ortasyn qalyptastyrý. Sondyqtan «Kenesary» turǵyn úi kesheniniń janynan 1200 oryndyq zamanaýi mektep salyndy», – dedi qala ákimi.
Almaty turǵyndaryn sapaly ári qoljetimdi turǵyn úimen qamtamasyz etý qala damýynyń basym baǵyttarynyń biri bolyp qala beredi jáne Memleket basshysynyń tapsyrmalaryna sáikes kezeń-kezeńimen júzege asyrylyp keledi.
