Shymkentte sút óndirisin damytýǵa berilgen memlekettik sýbsidiialarǵa tekserý júrgizý nátijesinde memleketke keltirilgen boljamdy shyǵyn kólemi 5 mlrd teńgege jetkeni anyqtaldy. Aýdit qorytyndylary protsessýaldyq sheshim qabyldaý úshin tiisti organdarǵa joldandy, dep habarlaidy dalanews.kz.
Kozachkov offside telegram arnasynyń málimetinshe, Ishki memlekettik aýdit departamenti men Ulttyq qaýipsizdik komiteti prokýratýranyń úilestirýimen júrgizgen tekserý barysynda memlekettik qoldaýǵa ie bolǵan 12 kompaniianyń sút ónimderin óndirý kólemin jasandy túrde arttyryp kórsetkeni jáne qoldaǵy iri qara mal sany týraly jalǵan málimet bergeni anyqtalǵan.
Aldyn ala esep boiynsha, osy áreketterdiń saldarynan memleketke kelgen shyǵyn 5 mlrd teńgeni quraǵan.
Tekserý barysynda «Novoe moloko», «Maily-Sýt», «Molochnyi master» jáne «IS Moloko» kompaniialarynyń qyzmeti de zerdelendi. Aýditorlar qarjylyq zańbuzýshylyqtardy anyqtap, tergeý aiasynda tintý júrgizilip, ónim jetkizýshilerden jaýap alynǵan.
Tergeý nusqasyna sáikes, sút óndiretin kásiporyndardyń biri is júzinde jumys istemegen. Sondai-aq sút jetkizýshi retinde kórsetilgen 15 sharýa qojalyǵynda iri qara mal múlde bolmaǵany belgili bolǵan. Osy epizodtar boiynsha ǵana memleketke keltirilgen boljamdy shyǵyn 1,3 mlrd teńgeden asqan.
Sonymen qatar osy isterdiń birine qatysty qylmystyq is prokýratýranyń qaýlysymen toqtatylǵan. Buǵan aýdit qorytyndylarymen is qatysýshylarynyń tolyq tanystyrylmaýy, tekserý tujyrymdarynyń áli erte ári jetkilikti negizdelmegen dep tanylýy, sondai-aq mámilelerdiń zańsyz dep tanylmaýy sebep bolǵany aityldy.
Aita keteiik, sońǵy jyldary aýyl sharýashylyǵyna bólinetin sýbsidiialardy zańsyz alý faktileri elimizdiń birneshe óńirinde tirkelgen. Buǵan deiin Qarjylyq monitoring agenttigi Almaty oblysynyń burynǵy depýtatyna qatysty 2,6 mlrd teńgeden astam sýbsidiiany zańsyz aldy degen kúdikpen qozǵalǵan isti sotqa joldaǵan bolatyn.
Sondai-aq Almaty oblysynda 251 mln teńge sýbsidiiany zańsyz alǵany úshin eki adam alty jylǵa deiin bas bostandyǵynan aiyrylsa, Qostanai oblysynda 2,5 mlrd teńgeden astam qarjyny jymqyrdy dep aiyptalǵan 30 adam kináli dep tanyldy. Al Túrkistan oblysynda aýyl sharýashylyǵy kooperativiniń tóraiymy 20 mln teńgeden astam sýbsidiiany zańsyz alǵany úshin sottalǵan.
Buǵan qosa, aýyl sharýashylyǵy sýbsidiialaryn bólý máselesine bailanysty Aýyl sharýashylyǵy ministri Aidarbek Saparovqa qatysty da qoǵamda suraqtar týyndaǵan edi. BAQ onyń jaqyn týystary memlekettik qoldaý alatyn agrarlyq kásippen ainalysatynyn aityp, yqtimal múddeler qaqtyǵysyna nazar aýdarǵan. Ministr óz kezeginde atalǵan kásiporyndardyń quryltaishysy emes ekenin, al sýbsidiia bólý týraly sheshimdi ministrlik emes, oblys ákimdikteri qabyldaitynyn málimdegen.
