Semınardyń plenarlyq bólimin ashqan Ýnıversıtettiń oqý-ádistemelik jumysy jónindegi prorektory Ǵabıt Kenjebaev alǵy sózinde:
– Joǵary oqý oryndaryn sıfrlandyrý dáýirinde kitaphanalardyń alatyn orny erekshe ekenin atap ótkim keledi. Sebebi, kitaphana aqparattardy jınap, saqtaýshy oryn ǵana emes, oqyrmandardy óz betinshe bilim alýǵa, ár túrli aqparat kózderimen jumys isteýge úıretetin, olardyń izdenis áreketterin, ǵylymı-zertteý qyzmetin damyta otyryp, saýatty paıdalanýshyny qalyptastyratyn mekeme. Sondyqtan da bilim alýshylardy sıfrlyq aqparattyq keńistikte jeteleýde kitaphana isiniń basqalardan ozyq turýy mindet dep oılaımyn, – dedi.
QR BǴM-niń Respýblıkalyq ǵylymı-pedagogıkalyq kitaphanasynyń dırektory Aıman Nasyrova qatysýshylardy semınardyń ashylýymen quttyqtap, sıfrlyq álemdegi kitaphanalardyń damýy týraly «Sıfrlyq jaћandaný jaǵdaıynda joǵary oqý oryndary kitaphanalarynyń damý úrdisteri» taqyrybynda baıandama jasady.
– Búginde bizder sıfrlyq tehnologıalardyń belsendi paıdalanýshylaryna aınalýdamyz. «Sıfrlyq Qazaqstan» memlekettik baǵdarlamasy – bilim ekonomıkasyna kóshýdi qamtamasyz etý úshin kreatıvti qoǵam qurýǵa baǵyttalǵan «Adamı kapıtaldy damytý» baǵyty boıynsha iske asyrý qazaqstandyq joǵary oqý oryndarynyń aldyna mindetter qoıyp otyr. Olar jańa bilimder men ınovasıalardy týyndatý ortalyqtaryna aınalýy, ekonomıkanyń basym sektorlaryn bilikti kadrlyq resýrstarmen qamtamasyz etýi, rýhanı-ıntellıgenttik elıtany tárbıeleýi tıis. Osy strategıalyq mindetterdi sheshýde joǵary oqý oryndary kitaphanalary da mańyzdy oryn alady, olar jańa býyndy ınovasıalyq kitaphanalar bolýy tıis.
Sóz sońynda Qazaqstan Respýblıkasy joǵary oqý orny kitaphanalarynyń úzdik qyzmetkerlerin, solardyń ishinde QazUPÝ-dyń Ǵylymı kitaphana dırektory Nurgúl Imansydyqovaǵa, kitaphananyń ekspert menejeri Náılá Seksenbaevaǵa Bilim jáne ǵylym mınıstrliginiń gramotasymen marapattady.
Semınardyń plenarlyq bólimde Máskeý memlekettik mádenıet ınstıtýty mádenıetti jáne elektrondyq kitaphanalardy aqparattandyrý kafedrasynyń profesory Vadım Stepanov (Máskeý qalasy), Qoja Ahmet Iasaýı atyndaǵy Qazaq-túrik ýnıversıtetiniń profesory Toplý Mehmet, K. Karasaev atyndaǵy Bishkek gýmanıtarlyq ýnıversıteti ǵylymı kitaphanasynyń dırektory Roza Týrdýkeeva (Bishkek qalasy) baıandama jasady.
Halyqaralyq ǵylymı-praktıkalyq semınardyń dıskýssıalyq májilisine QR joǵary oqý orny kitaphanalarynyń basshylary belsene qatysyp, tájirıbelerimen almasty. Jalpy semınar baǵdarlamasyna mádenıet, bilim berý salalarynyń jáne Reseı, Qyrǵyzstan, Túrkıa, Qytaı jáne Qazaqstan joǵary oqý orny kitaphanalary basshylarynyń 50-den astam baıandamalary kirdi.
Rımma Janbaeva
