Joǵary Sot Keńesi sot júiesindegi kadr saiasatyn qaita qarap, sýdialardy irikteý men taǵaiyndaý rásimderin jedeldetti, dep habarlaidy Dala News.
Keńestiń kezekti otyrysynda komissiialar men Sot jiýriiniń 2025 jylǵy jumysy qorytyndylanyp, sýdia korpýsyn jańartýǵa baǵyttalǵan jańa tásilder tanystyryldy. Keńes tóraǵasy Dmitrii Malahov sýdialyqqa úmitkerler sanyn arttyrý úshin buryn bolmaǵan qadamdarǵa barǵandaryn aitty.
«Sot júiesine myqty zańgerlerdi tartý maqsatynda Keńes alǵash ret advokattar men zańgerler qaýymdastyqtary, sondai-aq quqyq qorǵaý jáne arnaýly organdar qyzmetkerleri úshin onlain-túsindirý seminarlaryn ótkizdi. Sonyń nátijesinde irikteýge qatysýshylar sany ótken jylmen salystyrǵanda eki esege jýyq artty», - dedi Keńes tóraǵasy Dmitrii Malahov.
Onyń aitýynsha, 2025 jyly sýdialardy irikteý kezinde naqty salalarǵa – jer, korporativtik, salyq jáne qarjy quqyǵyna mamandanǵan zańgerlerge basymdyq berilgen. Bul sottaǵy kúrdeli isterdiń sapaly qaralýyna tikelei áser etýi tiis.
Joǵary Sot Keńesi irikteý rásimderiniń ashyqtyǵyn kúsheitýge de mán bergen. Taǵaiyndaýǵa usynylǵan kandidattar týraly aqparat onlain formatta jariialanyp, qoǵamǵa qoljetimdi etilgen. Keńes bul qadamdy sot júiesine degen senimdi arttyrýǵa baǵyttalǵan sheshim retinde baǵalap otyr.
Sonymen qatar sýdialyq biliktilik emtihandarynyń tártibi qaita qaralǵan. Emtihandar júieli túrde ótkizilip, barlyq kezeńderden ótý merzimi qysqartylǵan. Bul bir jaǵynan protsesti jedeldetse, ekinshi jaǵynan talaptardyń saqtalýyna qatysty suraqtar týyndatady.
Tártiptik praktika boiynsha da ózgerister bar. Keńes málimetinshe, Sot ádilqazynyń sheshimderine shaǵymdar sany azaiǵan. Resmi derek muny sheshimderdiń birizdenýimen túsindiredi.
Joǵary Sot Keńesinde aldaǵy kezeńde de sýdialardyń táýelsizdigi men sot júiesiniń ashyqtyǵyn kúsheitý jumysy jalǵasatynyn málimdedi.
