Atyraý, Aqtóbe, Aqmola, Qostanai, Soltústik Qazaqstan oblystarynda sý tasqynyna qatysty jaǵdai kúrdeli. Myńdaǵan adam baspanasy men mal-múlkinen áp sátte airylyp qaldy. Adam shyǵyny da joq emes.
1981-1995 jyldary Qazaqstannyń sý sharýashylyǵyn basqarǵan Nariman Qypshaqbaev eldegi osy tótenshe jaǵdaiǵa pikir bildirdi, - dep habarlaidy Dalanews.kz.
Sý salasynda uzaq jylǵy tájiribesi bar maman dál osy tabiǵi resýrs memlekettiń basty kúshi ekenin aitady.
"El bolamyn deseń jeriń men sýyńa ie bol. Ie bol degen sóz - ony retteý, josparlaý, tiisti qurylystar salý, olardy kútý. Sý degen jaqsy qasietimen elge qyzmet etýi kerek. Memlekettiń negizi - qai memleket bolsyn, meniń túsinigimde, jer men sý. Jeri men sýy joq memleket bolmaidy.
30 jylda memlekettiń negizi munai dedi. Munai - taýsylatyn resýrs. Sý, jer - taýsylmaityn resýrs. Qazaqstannyń ekonomikasynyń, áleýmettik jaǵdaiynyń durys bolmaýy osy eki resýrsqa nazar aýdarmaýda dep esepteimin. 30 jyl Sý ministrligin qurmai, byltyr qyrkúiekte qurdy. Sóitip sý sharýashylyǵy mynadai jaǵdaiǵa ákeldi. Ne qurylystary jumys istemeidi, barlyq sý mamany qańǵyryp ketti. Oblysqa, aýdanǵa barsań, "sý jaǵdaiy ne bolyp jatyr?" dep suraityn adam joq. Qaida ketti? Osyny qurtqan - biz. Sý ministrligin joidyq, oblystyq, aýdandyq sý sharýashylyǵyn joidyq. Onyń ornyna Astananyń mańaiynda kerek emes kontorlardy quryp alyp otyrmyz. Qazirgi kezde osy tasqynmen kim ainalysyp jatyr? Mynaý sýdyń iesi kim dep suraý kerek qoi. Jańadan kelgen ministr júgirip júr, áli bir jyl bolǵan joq kelgenine. Osyǵan deiin kim jaýap berdi? Nazarbaev bárin, ministrlikti japty, qurtty", - dedi ol Ara Media-ǵa suhbatynda.
Injener, gidrotehnik osy salada mamandar qańǵyryp ketkenin aitty.
"Ministrlikti kúsheitý kerek. Sý sharýashylyq mekemelerin oblystyq deńgeide, aýdandyq deńgeide kúsheitýimiz kerek.
...Sý mamandary qańǵyryp ketti. Ony da birneshe jyl aittym. Astanada otyryp egis egý, Astanadan otyryp egistikti sýarý degendi túsinbeimin. Bári aýylda, oblysta bolý kerek. Kanal sonda, sý sonda, jer sonda, sharýa qojalyqtary da sonda.
Sý mamany sonda bolý kerek. Astananyń mańaiynda sonyń bárin jinaqtaý degen aýrýǵa ushyrady. El aqyldasatyn mamandar tabylmai jatyr", - deidi ol Assyltas TV-ǵa bergen suhbatynda.
Aita keteiik, keiingi málimetterge súiensek, sý tasqyny bastalǵaly beri azamattyq qorǵanys qyzmetteri 99 869 adamdy, onyń ishinde 36 591 balany qaýipsiz jerlerge jetkizdi. Ýaqytsha ornalastyrý pýnkterine 6 586 adam, onyń ishinde 3 197 bala ornalasty.
Aqtóbe, Qostanai, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy tótenshe jaǵdailar jariialandy.
Odan bólek 9 million tekshe metr erigen qar sýy shyǵarylǵan, 1,6 million qapshyq jáne 1,2 million tonna inertti material tóseldi. Avariialyq-qutqarý jumystaryna 34 272 adam, 4 myń tehnika, 17 áýe kemesi jumyldyrylǵan.
