Petropavlda boi kóteretin sport saraiyn salýǵa 8,3 gektar jer telim bólingen. Kópbeiindi Sport saraiynda 17 zaldan jáne qosymsha úi-jailar bolady dep kútilýde.
Nysannyń negizgi bóliginde 3124 kórermen siiatyn úlken ámbebap sport zaly oryn tebedi. Aýqymdy zal shaǵyn fýtboldan, voleibol, basketbol, gandboldan aýqymdy jarystardy ótkizýge múkindik beredi. Sondai-aq, ony kontsertterge, túrli is-sharalarǵa da qoldanýǵa bolady.
– Tehnologiialyq jaǵynan nysan birneshe avtonomdy bólikke bólinedi. Bul bir mezgilde birneshe is-sharany qatarynan uiymdastyrýǵa múmkindik bermek. Joba iske qosylǵan jaǵdaida 200-den astam turaqty jumys orny ashylady. Búginde joba tolyq jasaldy, qazir memlekettik saraptamadan ótip jatyr, – dedi SQO ákiminiń orynbasary Sátjan Ablaliev.
Jalpy SQO-da sońǵy 5 jylda 8 dene shynyqtyrý-saýyqtyrý kesheni salynyp, qoldanysqa berilgen. Biyl taǵy tórteýi aýdan ortalyqtarynda salynýda. Budan basqa biýdjet pen jeke qarajatqa qysqy sport túrlerin damytý maqsatynda aýdan ortalyqtarynda 7 jabyq hokkei korty salynǵan. Biyl taǵy ekeýiniń qurylysy Aiyrtaý, Taiynsha aýdandarynda qolǵa alyndy.
Al UEFA erejeleri men standarttaryna sáikes bolý úshin Petropavldaǵy «Qarasai» stadionyn jańǵyrtý qajettigi týyndady. Búginde atqarylatyn jumystyń jobasy ázirlendi, merdiger kompaniia tańdap alyndy.
Joba boiynsha fýtbol alańy avtomatty túrde sýarylyp, jylytylady. Sondai-aq jańadan jaryq tartylyp, elektrondy tablosy men dybystyq qondyrǵy aýystyrylmaq.
