Sot Daniiar Hasenovtyń ózin bankrot dep taný týraly ótinishin qanaǵattandyrmady. Mundai sheshim qabyldaýǵa negiz bolǵan — onyń múliktik jaǵdaiy men tabysy týraly tolyq ári shynaiy aqparattyń bolmaýy, dep habarlaidy Dalanews.kz Nege.kz-ke silteme jasap.
Is materialdaryna sáikes, Hasenovtiń «Problemalyq kreditter qory» AQ aldyndaǵy bereshegi 23,8 mlrd teńgeni quraidy. Bul qaryz 2003 jyly «Kazkommertsbank» pen «AziiaPromSbyt» JShS arasynda jasalǵan nesielik jeli ashý týraly kelisim aiasynda paida bolǵan. Mindettemelerdi oryndaý kepildigi retinde Daniiar Hasenovtiń jazbasha kepildigi de kórsetilgen.
Qarjylyq basqarýshynyń aitýynsha, qazirgi tańda Hasenovtiń atyna jyljymaly da, jyljymaityn múlik te tirkelmegen, al ortasha ailyq tabysy — 0 teńge. Alaida ol birqatar zańdy tulǵalarǵa ielik etedi:
«Petroleum Invest Corporation» JShS — 65%,
«Korporatsiia Imperial Invest» JShS — 90%,
«Birikken tehnologiialar men qarjy» JShS — 50%,
«Megasport» fýtbol klýby» JShS — 50%.
Sot anyqtaǵandai, Hasenov ózin tolyq tólem qabiletinen aiyrylǵan dep málimdegenimen, «Petroleum Invest Corporation» 2024 jyly 9,5 mln teńgeden astam salyq tólegen. Qalǵan kompaniialar da áli jabylmaǵan jáne bankrot dep tanylmaǵan. Sonymen qatar, qarjylyq basqarýshy atalǵan zańdy tulǵalardyń naqty qarjylyq jaǵdaiyn baǵalamaǵan jáne qosalqy boryshkerlerdi sýbsidiarlyq jaýapkershilikke tartý múmkindigi týraly qorytyndy usynbaǵan.
«Sot Hasenovtiń áreketterinen adaldyq printsipin baiqamady, óitkeni ol qomaqty somaǵa kepilger bola otyryp, óz mindettemelerin óteý úshin eshqandai áreket jasamaǵan», – delingen sýdianyń málimdemesinde.
Sot qaryzdyń ózi azamatty bankrot dep taný úshin jetkiliksiz negiz ekenin atap ótti. Hasenovtiń tabyssyz qalýyna bailanysty aýrý, múgedektik nemese eńbekke jaramsyzdyq siiaqty obektivti sebepterdi rastaityn eshqandai qujat usynylmaǵan. Kerisinshe, sot jumyssyzdyq onyń jeke tańdaýy degen qorytyndyǵa keldi.
Sonymen qatar, Hasenovtiń otbasylyq jaǵdaiy týraly da jazbasha aqparat usynylmaǵan.
«Joǵaryda aitylǵandar boryshkerdiń óziniń naqty múliktik jaǵdaiy týraly málimetterdi jasyryp otyrǵanyn kórsetedi. Qaryzdyq mindettemeler paida bolǵan kezde óziniń tólem qabilettiligin qamtamasyz etý úshin jetkilikti ári tiisti sharalar qoldanǵanyn dáleldeitin qujattar da sotqa usynylǵan joq», – dedi sýdia.
Daniiar Hasenov — burynǵy kásibi fýtbolshy jáne «Qazaqstan temir joly» ulttyq kompaniiasynyń top-menedjeri bolǵan. Ol — Áliia Nazarbaevanyń burynǵy kúieýi, olardyń ortaq balalary bar.
