Parijde ótip jatqan olimpiada oiyndaryna bara almaitynyn aitqan Elena Rybakina qazaqstandyqtardan keshirim surady, - dep habarlaidy Dalanews.kz.
«Qurmetti qazaqstandyqtar, Parijdegi Olimpiada oiyndaryna Qazaqstan quramasymen qatysa almaitynyma ókinetinimdi aitýdyń sáti endi tústi. Men komandamen daiyndalyp, jarys bastalardyń aldynda aýyryp qaldym. Dene qyzýym kóterilip, dem alýym qiyndap, dárigerler maǵan kortta óner kórsetýime tyiym saldy. Sonsha úmittengen qazaqstandyq jankúierlergen keshirim suraǵym keledi. Ózim de qatty ókinip otyrmyn, sebebi komandamen kóp jumys istep, medal ielengim keldi. Tokiodaǵy olimpiadada júldeli oryn alýyma az qalǵan edi. Jaqyn arada kortqa oralamyn dep úmittenemin jáne otandastaryma alǵys aitqym keledi. Sebebi qai elde óner kórsetsem de qoldaýdy sezip, elimizdiń týyn kórgende qýanamyn», - deidi Elena.
Eske salaiyq, buǵan deiin bilikke jaqyn sarapshylar tennisshi Rybakina men Pýtintseva ne úshin Olimpiadaǵa qatysýdan bas tartýy múmkin ekenin aitty.
"Chemodan gossekretov" telegram arnasynyń málimetinshe, Rybakina men Pýtintsevanyń Olimpiadaǵa qatysýdan bas tartýy federatsiianyń qasaqana sabotajy bolýy múmkin. Sarapshylar mundai boljamdy derekkózderine súienip aityp otyr.
"Sportshylar, ásirese qolastyna alynǵandar (ekinshi bir eldiń adamyna azamattyq quqyq berý), qalamaqy (gonorar) somasyna qaraidy jáne olar tennis federatsiiasynyń basshylyǵynan tiisti motivatsiia almaǵan bolýy múmkin. Olar Qazaqstannyń atynan shyqsa mindetti túrde medal alýy múmkin edi. Derekkózder bul másele boiynsha túsindirý jumystary júrgiziletinin habarlady", - delingen jazbada.
Eske salaiyq, buǵan deiin WTA reitinginde 4-orynda turǵan qazaqstandyq tennisshi Elena Rybakina 2024 jyly Parijde ótetin Olimpiada oiyndaryna qatysýdan bas tartý týraly sheshim qabyldaǵany belgili bolǵan edi.
"Qurmetti qazaqstandyqtar! Maǵan bul týraly aitý ońaiǵa soqpady. Ókinishke qarai, Parij Olimpiadasyna qatysa almaimyn. Ýimbldon týrnirinen keiin men jedel bronhitpen aýyryp qaldym, jattyǵýǵa qaita oralýǵa tyrysqanymmen, denem áli qalpyna kelgen joq. Dárigerler kortqa shyǵýyma úzildi-kesildi tyiym saldy", - dedi ol.
Osy tusta ol Olimpiadaǵa qatysatyn qazaqstandyq sportshylardy qoldaitynyn jetkizdi.
Artynsha Tennisshi Iýliia Pýtintseva da Parij Olimpiadasyna qatyspaityny belgili boldy.
Qazaqstan tennis federatsiianyń málimetinshe, Pýtintseva Parijge ushyp kelip, belsendi túrde jattyǵa bastaǵan. Alaida ýkrainalyq Marta Kostiýkpen bolatyn match aldyndaǵy daiyndyqty qazaqstandyq sportshy tizesin aýyrtyp alǵan. Meditsinalyq tekserýden ótken soń týrnirden bas tartý týraly sheshim qabyldandy.
Aita ketelik, buǵan deiin de Iýliia tizesindegi jaraqatyn aityp, shaǵymdanǵan bolatyn.
Qazaqstan tennis federatsiiasynyń vitse-prezidenti Dias Dosqaraev atalǵan jaǵdaiǵa qatysty pikir bildirdi.
“Parij Olimpiadasy biz úshin synaqpen bastalýda. Aldymen Elena Rybakina syrqatyna bailanysty bas tartsa, búgin Iýliia Pýtintseva jarqatyna bailanysty jarysty toqtatty. Eki sportshyǵa da úlken úmit artqan edik, ókinishti", - dedi Dosqaraev.
