Jalalabad oblysy Aksy aýdanynyń qyrǵyz-ózbek shekarasyna jaqyn Sogot aýyly mańyndaǵy daýly jer telimi kórshe elge qaraidy, dep esepteidi aýdan biligi. Degenmen oblys basshylyǵy buny joqqa shyǵaryp, daýly jerdi qyrǵyzstandyqtar uzaq jyldar boiy paidalanyp kelgenin alǵa tartty.
Aksy aýdany ákimshiligi apparatynyń basshysy Altynbek Kýtmanovtyń aitýynsha, shildeniń basynda shekarany delimitatsiialaý jáne demarkatsiialaý jónindegi komissiia ókilderi, sondai-aq japsarlas ornalasqan shekara otriadtarynyń basshylary osy jer teliminde jolyqty.
«Kartalar men hattamalar zertteldi. Sóitip daýly jerdiń Ózbekstanǵa qaraityny anyqtaldy. Jer teliminiń kimge qaraityny 2001 jyly 23 tamyzda qabyldanǵan №8 hattamamen kelisilip, Bishkekte 2003 jyly 23 qyrkúiekte №12 hattamamen bekitilgen», - dedi ol.
«Osy hattamalardan jer teliminiń ózbek jaǵyna tiesili ekeni anyqtaldy. Degenmen bul sheshim úkimet deńgeiinde bekitilýi kerek. Soǵan deiin eki eldiń shekarashylary bul jerge jaqyndamaidy. Ózbek tarapy osy ýaqytqa deiin bul jerge qatysty talaptaryn aitpai keldi, bizdiń azamattar sony paidalanyp qalǵan», - dedi Altynbek Kýtmanov.
Jalalabad oblysynda 27 daýly shekaralas jer telimi bar, olardyń deni Aksy jáne Ala-Býka aýdanynda ornalasqan. Degenmen Shekara qyzmetine súiengen oblystyq ákimshiliktegiler Sogottegi jer telimin ózbekterdiki deýge áli erte ekenin alǵa tartyp otyr.
«Altynbek Kýtmanovtyń aitqandary resmi emes jáne rastalmaǵan bolýy múmkin. Aýdan jáne oblys basshylarynyń sózderine qaraǵanda, bul málimetter jalǵan bolyp shyqty. Úkimet deńgeiinde jariialanǵan aqparatty ǵana qabyldaýǵa bolady. Bul máseleni úkimettik komissiia sheship, ony Jogorký Kenesh maquldaýy tiis. Sodan keiin ǵana naqtysyn aita alamyz», - dedi úkimettiń oblystaǵy ókiliniń orynbasary Baktybek Anarkýlov.
