Eks-ministr Qýandyq Bishimbaev sotta sońǵy sózin aitty, - dep habarlaidy Dalanews.kz.
"Alqabiler sotynyń bolýy - meniń tańdaýym boldy. Men úshin bul ońai tańdaý emes ekenin túsindim. Áleýmettik jelide, BAQ-ta taraǵan kampaniialar, maǵan degen óshpendilik pen jaǵdaidy burmalaý, meni jáne otbasymdy qaralaýǵa bailanysty kez kelgen alqabiler maǵan qarsy shyǵatynyn túsindim. Buǵan qaramastan men jáne meniń qorǵaýshylarym ashyq sot ótkizýdi sheshtik. Men ózime bir ǵana maqsat qoidym - kem degende on adamǵa qaiǵyly oqiǵa bolǵan tún týraly jáne Saltanat ekeýimizdiń qarym-qatynasymyz týraly shyndyqty jetkizý", - deidi Bishimbaev.
Bishimbaev qaiǵyly oqiǵa bolǵan túni synaqqa tap bolǵanyn, ol bul synaqtan ótpegenin aitady. Sonymen qatar, eks-ministr Saltanattyń jaqyndary, óziniń ata-anasy men balalarynan keshirim surady.
"Meniń jaqyndarymnyń esh kinási joq. Bul jaǵdaiǵa tek men kinálimin. Eshkimge ólim tilegen adam emespin. Mundai bolady dep oilaǵan joqpyn. Qurmetti alqabiler, men kinálimin, biraq qasaqana, ádeii óltirgen joqpyn. Ustalǵan kúni-aq bar shyndyqty aittym", - deidi eks-ministr.
Bishimbaev alqabilerden ádil sheshim shyǵarýdy, propagandaǵa ilespeýin surady.
"Saltanattyń ólimine qatysym bar, kinálimin, oǵan jaýap berýge daiynmyn. Men abaisyzda onyń densaýlyǵyna qasaqana aýyr ziian keltirip, onyń ólimine ákep soqqany úshin kinálimin. Men kinálimin, biraq qasaqana óltirgenim úshin emes", - deidi Bishimbaev.
