Aýyl sharýashylyǵy ministrligi qazaqstandyqtarǵa shilde aiynyń sońyna deiin qarbyz tutynýǵa asyqpaýǵa keńes berdi, dep habarlaidy dalanews.kz.
Vedomstvonyń vitse-ministri Azat Sultanovtyń aitýynsha, dál osy kezeńniń sońyna qarai baqsha daqyldary eshqandai tyńaitqyshtar men ósý stimýliatorlaryn qoldanbai, tabiǵi jolmen tolyq pisedi.
Onyń sózinshe, maýsymnan erte satylymǵa shyǵatyn qarbyzdardyń basym bóligi arnaiy jabyndardyń astynda ósiriledi nemese olardyń ósýin jedeldetetin túrli qospalar paidalanylady. Sondyqtan mundai qarbyzdardy, ásirese, balalarǵa bermegen durys.
Sondai-aq ministrlikke sáikes, Qazaqstanǵa importtalatyn barlyq jemis-kókónis ónimderi mindetti túrde fitosanitariialyq baqylaýdan ótkizilip, ziiankester men ósimdik aýrýlarynyń bar-joǵy tekseriledi.
