Qazaqstanda sybailas jemqorlyqpen kúres jańa ǵylymi deńgeige kóterildi. Bas prokýratýra janyndaǵy Quqyq qorǵaý organdary akademiiasy júrgizgen keshendi zertteý quqyq qoldaný tájiribesin taldap, jemqorlyqtyń aldyn alý men zańnamany jetildirýge baǵyttalǵan naqty usynymdar ázirledi,- dep habarlaidy Dalanews.kz
Sybailas jemqorlyq – memlekettik basqarý júiesiniń turaqtylyǵyna qaýip tóndirip, áleýmettik-ekonomikalyq damýdy tejeitin jáne azamattardyń bilikke degen senimin álsiretetin júieli problemalardyń biri ekeni anyq.
Qazaqstanda bul keselge qarsy kúreske baǵyttalǵan keshendi saiasat júzege asyrylýda. Bul saiasat zamanaýi quqyqtyq jáne institýtsionaldyq tetikterdi engizýdi qamtidy. Onyń baǵyttary 2024 jylǵy Sybailas jemqorlyqqa qarsy is-qimyl jónindegi Ulttyq baiandamada jáne Sybailas jemqorlyqqa qarsy memleketter toby, iaǵni GREKO uiymy men Ekonomikalyq yntymaqtastyq jáne damý uiymynyń Ystambul is-qimyl jospary aiasyndaǵy halyqaralyq usynymdarda kórinis tapty.
Sondai-aq Qazaqstan Respýblikasynyń sybailas jemqorlyqqa qarsy saiasatynyń 2022–2026 jyldarǵa arnalǵan tujyrymdamasy qabyldanyp, saladaǵy negizgi reformalardyń baǵyttaryn aiqyndap berdi. Onda aldyn alý tetikterin jetildirý, quqyqtyq jaýaptylyq sharalaryn kúsheitý, memlekettik baqylaýdy tsifrlandyrý, kvazimemlekettik sektorda komplaens júiesin engizý, sondai-aq monitoring pen úilestirý sapasyn arttyrý syndy mindetter qoiylǵan.
Sybailas jemqorlyqtyń kórinisteri saiasi turaqtylyqqa, ádil básekelestikke jáne investitsiialyq ahýalǵa keri áser etetini sózsiz. Sondyqtan onymen kúrestiń tiimdiligin arttyrý úshin elimizde qalyptasqan ahýal men álemniń damyǵan memleketterindegi ozyq tájiribeni salystyra otyryp, tereń ǵylymi turǵydan únemi zerdeleý óte mańyzdy.
Osy maqsatta 2024 jyly Qazaqstan Respýblikasynyń Bas prokýratýrasy janyndaǵy Quqyq qorǵaý organdary akademiiasy «Sybailas jemqorlyqqa qarsy is-qimyldyń ózekti máseleleri» taqyrybynda keshendi ǵylymi zertteý júrgizdi.
Zertteýdiń maqsaty – quqyq qoldaný tájiribesindegi problemalardy, zańnamalyq olqylyqtar men qaishylyqtardy anyqtap, normativtik-quqyqtyq bazany jetildirýge baǵyttalǵan naqty usynymdar ázirleý boldy.
Zertteý aiasynda myna máseleler qarastyryldy:
- sybailas jemqorlyq uǵymyn anyqtaýdyń zamanaýi tásilderi,
- prokýrorlyq qadaǵalaýdyń atqaratyn róli,
- sybailas jemqorlyqqa qarsy shekteýlerdi iske asyrý praktikasy,
- ulttyq modelge jańa institýttardy engizýdiń tiimdiligi (kásibi parasattylyqqa testileý, memlekettik qyzmette jáne kvazimemlekettik sektorda múddeler qaqtyǵysyn anyqtaý men retteýdi reglamentteý, sybailas jemqorlyqqa qarsy komplaensti damytý, negizsiz baiý).
Nátijesinde birqatar ǵylymi maqalalar men «Qazaqstan Respýblikasynda sybailas jemqorlyqqa qarsy is-qimyldyń teoriialyq jáne praktikalyq máseleleri» atty monografiia jaryq kórdi.
Ǵylymi nátijeler halyqaralyq ǵylymi-tájiribelik is-sharalarda keńinen talqylanyp, quqyq qorǵaý organdary bilim berý uiymdarynyń baǵdarlamalaryna engizildi. Eń bastysy – ázirlengen usynymdar Sybailas jemqorlyqqa qarsy is-qimyl agenttigine joldanyp, zertteýshi avtorlar zań shyǵarý jáne praktikalyq iske asyrý jónindegi jumys toptarynyń quramyna endi.
Zertteýdiń tolyq nusqasymen Qazaqstan Respýblikasynyń Bas prokýratýrasy janyndaǵy Quqyq qorǵaý organdary akademiiasynyń resmi saityndaǵy repozitoriide tanysýǵa bolady.
Jaqsylyqov Rýslan Ádilbekuly,
QR Bas prokýratýrasy janyndaǵy
Quqyq qorǵaý organdary akademiiasynyń
bas ǵylymi qyzmetkeri, ádilet keńesshisi.
