Shýhrat Kaiýmov: "Ózbekstan táýelsizdigine 25 jyl, ózbek ultyna emes!"
Óner jáne mádeniet qairatkerleri men jýrnalister qatysqan jiynda sóz alǵan Ózbekstannyń halyq ártisi Shýhrat Kaiýmov jas ánshiniń ánderin darynsyz dep atady. Ol ásirese, jaqynda jazylǵan «Ózbegim» ániniń sózderine toqtaldy.
«Bir tanymal ánshi telearnaǵa jańa ánimen shyǵyp, «Saǵan 25 jyl, meniń ózbegim» deidi. Ózbek ultynyń 25-ke kelgenin qaidan kórdińiz? Ózbekstan táýelsizdigine 25 jyl, ózbek ultyna emes!» – dedi Kaiýmov.
Onyń pikirinshe, mundai qatelikterdi jibermeý úshin «Ózbeknavo» janynan kórkemdik keńes qurylyp, oǵan eldiń aqyn, jazýshylary, sazgerleri múshe bolýǵa tiisti. Sonymen birge jańa ánderdi efirge jiberer aldynda «ineniń kózinen» ótkizip, tekserý kerek deidi.
Ózbekstannyń jas ánshisi oryndap shyqqan «Ózbegim» ániniń sózderin jazǵan eldiń tanymal halyq aqyny, búginde Olii Májilis depýtaty Ikbola Mirzo eken. Ózbekstannyń mádeni synshylary eń aldymen ánshi Shahzodany emes, aqyndy synaýy tiis deidi.
«QmD» aqparat
