Shýda áleýmettik dúken ashyldy
Bul aýdanda búgingi kúnge deiin ashylyp otyrǵan ekinshi dúken ekenin de aita ketýimiz kerek. Burnaǵy jyldary aýdandaǵy «Úmit úii» qoǵamdyq birlestigi Tóle bi aýylynan dál osyndai áleýmettik dúken ashqan bolatyn. Qazirgi kezde jumysyn bir júiege keltirip alǵan atalmysh dúkendi aýdan turǵyndary jaqsy biledi. Qaiyrymdylyq jasaýǵa niettengen turǵyndar da osy dúkenge qaiyrylyp, hál-qadirinshe kómek qolyn sozyp kelgen. Endi mine, 40 myńǵa jýyq turǵyny bar Shý qalasynan «Aialy alaqan» atty áleýmettik dúken ashylyp otyr. Ortalyq bazardaǵy «Dostyq» úiiniń ishinen ashylǵan dúkenge «Saýda-servis» jaýapkershiligi shekteýli seriktestiginiń direktory V.Lytkin qoldaý bildirip, dúkenniń turatyn ornyn tegin beripti. Sonymen birge, áleýmettik dúkenniń ashylýyna sebepshi bolǵan azamattarǵa aýdan ákimdigi men «Jastar resýrstyq ortalyǵy» qoldaý bildirgenin aitý kerek.
«Qaiyrymdylyq jasasań, qaiyryn kóresiń» deidi qazaq danalyǵy. Bul dúkendi ashqan azamat ta birneshe jyldan beri muqtaj jandarǵa qaiyrymdylyq jasap, áleýmettik ortada ár túrli deńgeidegi otbasylardyń kem-ketigin jamap júrgen Erkin Túlebaev esimdi azamat. Muqtaj jandarǵa árdaiym kómek qolyn sozýdan shet qalmaityn ol birneshe jyldan beri aýdandaǵy «Eriktiler qozǵalysyna» jetekshilik etip keledi. «Qashanda kórshisin ash qaldyrmaǵan qazaq halqymyz «Elde bolsa, eringe tiedi» dep, jarty nan bolsa da bólip jeýge daiyn turǵan ǵoi. Bálkim, bul da bizdiń boiymyzdaǵy osyndai izgiliktiń ushqyny bolar. Alaida, biz ashyp otyrǵan áleýmettik dúkenniń artynda aty-jónin atamaýdy ótingen birqatar kásipker azamattar da bar. Kózge kórinbegenimen, kóp eńbek sol kisilerdiki», - deidi ol óz sózinde.
Baiqaǵanymyzdai, dúken ishindegi sórelerge sý jańa, ári sapasy joǵary aiaq-kiimder men túrli ólshemdegi kiim-keshekter qoiylypty. Bulardyń barlyǵyn aýdan kásipkerleri ákelip ótkizgen. Beisenbi men jeksenbi kúnderiniń aralyǵynda jumys isteitin dúkennen kómekke zárý jandar óz keregin tegin ala alady. Budan bólek, atalǵan dúkende áleýmettik jaǵynan az qamtylǵan otbasylarǵa et, un, mai jáne qant syndy azyq-túlik túrleri de beriledi eken. Tipti, munda balalarǵa arnalǵan oiynshyqtar da bar. Tańdaý – ár adamnyń óz erkinde.
Aita ketýimiz kerek, atalmysh dúkenge kez kelgen turǵyn ózi paidalanbaityn, alaida kiiýge jaramdy kiim-keshekteri men balalar oiynshyǵyn jáne azyq-túlik pen turmystyq qajettilikke kerekti barlyq zattardy ótkizýine bolady.
Jambyl oblysy
Shý aýdany
