Túrkistan qalasynda buqaralyq sportty damytýǵa baǵyttalǵan naqty qadamdar jasalýda. Oblys ákimi Ómirzaq Shókeevtiń bastamasymen búginde qalada birqatar sporttyq nysandardyń qurylysy júrip jatyr. 2024 jylǵa deıin qalada «Eskek esý» kesheni, «At sporty» men «Kórkem gımnastıka» sport kesheni, «Tenıs ortalyǵy», «Muz aıdyny» jáne sport ınternatyn salý josparlanǵan. Oktábr Jarylqapov atyndaǵy balalar stadıony jańartylady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Qaladaǵy ekoahýaldy jaqsartý úshin jan-jaqty jumystar júzege asýda. Oblys ortalyǵynda qolǵa alynǵan jańa jobalardyń barysymen tanysqan óńir basshysy Ómirzaq Shókeev merdigerlermen kezdesip, keı tustaryna ózgerister engizdi.

Jasyl jelekterdi gıdrantty júıemen sýarý ádisimen, Parasat baǵynyń aýmaǵyn tıimdi paıdalaný jobasymen tanysty.

Jalpy aýmaǵy 30 gektar jerge jaıǵasqan jasyl aýmaqty kógaldandyrýǵa ınvestorlar qol ushyn sozbaq. Olar munda 3 myń túp aǵash otyrǵyzyp, 600 myń gúl ekpek.

Osylaısha, saıabaq aýmaǵyn gúl ósirýge arnalǵan erekshe jylyjaıǵa aınaldyrý jobasyn iske asyrmaq. Saıabaqta aǵash kóshetterin ósirý aýmaǵyn qurý jospary aıasynda 10 gektar jerge terek, qaraǵash, shynar, úıeńki aǵashtarynyń 60 myń kósheti otyrǵyzylmaq. Tamshylatyp sýarý júıesi júrgiziledi.

Sondaı-aq oblys ákimi Turan men Otbasy saıabaqtarynda qolǵa alynatyn kógaldandyrý jumystarynyń jańa jobasymen tanysty. Jaýapty tulǵalarǵa naqty tapsyrmalar júktedi.