– Epidemiolog mamandar tarapynan búgin tirkelgen aýrý oshaqtarynda zalalsyzdandyrý, bailanysta bolǵandardy tabý jáne oqshaýlaý boiynsha epidemiiaǵa qarsy is-sharalar uiymdastyryldy. Infektsiia tabylǵan Ábdihalyq aýyly men Jetisai qalasyndaǵy móltekaýdanda karantin jariialandy. Jetisai aýdanyna dezinfektsiia, densaýlyq saqtaý, áleýmettik qorǵaý salasynan arnaiy mamandardan qurylǵan mobildi top jasaqtap, jiberildi, – dedi Ómirzaq Estaiuly.
Qosymsha kómek retinde meditsinalyq jabdyqtar men kólikter daiyn. Ózge aýdandardan infektsionist jáne reanimotologtardan quralǵan 6 brigada Jetisaiǵa joldandy.
Oblystyń Bas infektsionist dárigeri aýdanda osy sharalarǵa basshylyq etedi. Kerekti tósek-oryndar, gospitaldar tolyq daiyn. Oblys ákiminiń tapsyrmasymen, politsiia, tótenshe jaǵdai departamentimen, ulttyq qaýipsizdik komiteti, prokýratýra, densaýlyq saqtaý salasymen birlese otyryp, shuǵyl túrde karantin jariialanǵan eldimekender shekarasyna blok-beketter qoiylýda. Tótenshe jaǵdai rejimin buzǵan azamattar zań aiasynda jaýapqa tartylady.
Aýdanda infektsiia oshaǵy men qoǵamdyq oryndarda aýqymdy dezinfektsiia jumystary júrgiziledi. Indettiń taralý qaýpi joǵary bolǵandyqtan, oblys ákimi turǵyndardy tótenshe jaǵdaiǵa bailanysty qabyldanǵan sharalarǵa túsinistikpen qarap, tiisti tártiptik sharalardy saqtaýǵa, dárigerlerdiń nusqaýlyqtaryn buljytpai oryndaýǵa shaqyrdy.
Virýstyń taralýyn boldyrmaý maqsatynda oblys aýmaǵynda barlyq azamattar meditsinalyq betperde kiip júrýi kerek. Dúkender men qoǵamdyq oryndarda betperdesiz júrýge tyiym salynady. Onda arnaiy zalalsyzdandyrý quraldary ornatylýy tiis. Turǵyndar úiden tek qana azyq-túlik, dári-dármek alýǵa nemese jumysqa barý úshin shyǵýy kerek. Otbasylyq merekeler men toi-jiyndardy ótkizýge qatań tyiym salynady.
Ómirzaq Shókeev áleýmettik jelilerdi sharlaǵan ártúrli aqparattarǵa senbei, memlekettik organdar taratqan resmi málimettermen ǵana tanysýǵa shaqyrdy.
«Qurmetti jerlester! Dál qazir búkil álem qiyn kezeńde tur. Alaida, biz bul qiyn-qystaý ýaqyttan da birlik pen yntymaqtyń arqasynda aman-esen ótemiz dep senemin! Qazirgi tańda bizge tynyshtyq kerek, jalǵan aqparattarǵa senbeńizder. Resmi aqparatqa ǵana senińizder. Biz kúndelikti jaǵdaidy qatań baqylaýda ustap otyrmyz»,-dedi Ómirzaq Estaiuly óz úndeýinde.
Túrkistan oblysy ákiminiń baspasóz qyzmeti
