Shymkent qalasynda «Ádiletti jáne Progressivti Qazaqstannyń Halyqtyq Konstitýtsiiasy úshin!» qalalyq koalitsiiasy quryldy, dep habarlaidy Dala News.
Koalitsiianyń negizgi mindeti – referendýmǵa shyǵarylǵan ózgeristerdi turǵyndarǵa keńinen túsindirý, ashyq ári mazmundy qoǵamdyq dialogty qamtamasyz etý jáne azamattardyń naýqanǵa sanaly túrde qatysýyna jaǵdai jasaý.
Shymkent qalalyq koalitsiiasynyń jetekshisi bolyp Murat Joldyhojaev taǵaiyndaldy. Aldaǵy ýaqytta quramynda 150 adamy bar koalitsiia jumys isteidi. Olardyń qataryna saiasi partiia ókilderi, partiialyq jaqtastar, qoǵam qairatkerleri, ziialy qaýym ókilderi men jastar belsendileri tartylǵan. Úgit-nasihat kezeńinde koalitsiia músheleri bekitilgen jelilik kestege sáikes onlain jáne oflain formatta kezdesýler, pikirtalastar men túsindirý is-sharalaryn ótkizýdi josparlap otyr.
Aita ketsek, keshe Astana qalasynda Qazaqstan Respýblikasy Parlamenti Májilisiniń Tóraǵasy, partiia tóraǵasy Erlan Qoshanovtyń qatysýymen elimizdiń jetekshi qoǵamdyq-saiasi kúshteri «Ádiletti jáne Progressivti Qazaqstannyń Halyqtyq Konstitýtsiiasy úshin!» atty Jalpyulttyq koalitsiiaǵa birikti. Koalitsiia quramyna bes jetekshi saiasi partiia – «AMANAT», «Aýyl», «Aq jol», «Respublica», «Qazaqstan Halyq partiiasy» jáne milliondaǵan azamattyń múddesin bildiretin 300-den astam qoǵamdyq uiym endi.
Barlyq saiasi kúshter qabyldanatyn Jańa Ata Zań jobasyna biraýyzdan qoldaý bildirip otyr. Usynylǵan ózgerister men tolyqtyrýlar Konstitýtsiianyń barlyq bólimderin qamtyp, 77 bapqa qatysty engizilmek. Bul jalpy mátinniń 84% quraidy. Jańa redaktsiia 11 bólim men 96 baptan turady (buryn 9 bólim, 99 bap bolǵan).
Qalalyq koalitsiia jumysy aldaǵy referendým qarsańynda qoǵamdy toptastyryp, árbir azamattyń pikirin eskerýge jáne eldiń bolashaǵyna qatysty mańyzdy sheshimge belsendi qatysýyna baǵyttalmaq.
