Shymkent qalalyq politsiia departamenti qala turǵyny Baqytjan Naqypqa "tirkelmegen uiymnyń múshesi retinde" qazaq tili máselesin kóterip, qala prokýrory men til janashyrlaryn Báidibek bi eskertkishiniń aldyna shaqyrǵany úshin aiyppul saldy, dep habarlaidy Dalanews.kz.
Baqytjan Naqyp taǵylǵan aiyppen kelispeidi.
Politsiia hattamasyna qaraǵanda, Baýyrjan Naqyp TikTok áleýmettik jelisindegi "Qazaq" kanalynda tirkelmegen "Til maidany" uiymynyń múshesi retinde úndeý jariialap, til janashyrlaryn 7 mamyr kúni Báidibek bi dańǵyly boiynda ornalasqan Báidibek bi eskertkishiniń aldyna shaqyrǵan. Sóitip Ákimshilik kodekstiń "Tyiym salynǵan uiymnyń qyzmetine qatysý" baby (489-baby 10-tarmaǵy) boiynsha aiyptalǵan. Oǵan 184 600 teńge (419 dollar) aiyppul salynǵan.
Jaýapker taǵylǵan aiyppen kelispegen jáne ákimshilik hattamaǵa qol qoiýdan bas tartqan.
Baqytjan Naqyp Azattyqqa "Til maidany" uiymy jóninde eshqashan estimegenin jáne oǵan tirkelmegenin aitty. Másele 2 mamyr kúni qalalyq prokýratýra keńsesine baryp, qazaq tili máselesin kótergennen keiin bastalǵan. Bul hatta ol 7 mamyr kúni til janashyrlarymen birge qala prokýrory Ǵabit Muqanovty kezdesýge shaqyrǵan. Prokýrordan prokýratýra qyzmetkerleri qazaq tiline qatysty zańnyń oryndalýyn nege qadaǵalamaitynyn suramaq bolǵan.
"Aiyppul salýǵa negiz joq. Prokýratýraǵa joldaǵan hat pen áleýmettik jelide jariialaǵan úndeýde de "Til maidany" uiymy týraly bir aýyz sóz joq. Bul – jala", - deidi qala turǵyny Azattyqqa bergen jaýabynda.
Ol TikTok jelisindegi sońǵy videolardyń birinde Shymkent qalalyq prokýratýrasynyń qaqpasynda "qyzmettik kólikterge ǵana arnalǵan" (dlia slýjebnyh avtomashin prokýratýry goroda Shymkent) degen jazý tek orys tilinde ǵana baryn, nege memlekettik tilde eskertý jazylmaǵanyn alǵa tartyp, politsiiadan hattama toltyrýdy suraidy. Onyń aitýynsha, munda til týraly zań buzylyp tur.
7 mamyr qala prokýrory men til janashyrlaryn kezdesýge shaqyrǵan kúni politsiia Baqytjan Naqypty shaqyrtýsyz úiinen alyp ketip, politsiia bóliminde tórt saǵat ustaǵan. 11 mamyr kúni aiyppul salǵan.
