Bul týraly kaz.tengrinews.kz habarlap otyr.
Ózin órteýden bir kún buryn Aınabekov baspasóz máslıhaty kezinde bankrot aldynda turǵanyn aıtqan.
«2010 jyly ákim apparatynyń sharýashylyq basqarmasy «Kaıtpas-1» yqshamaýdanynda otbasylyq-dárigerlik ambýlatorıa qurylysyn júrgizýge tender utyp alǵan bolatyn. Ol kezde basqarmada qurylys júrgizý úshin ne adam, ne tehnıka bolmady, sondyqtan sheneýnikter qurylysty bizdiń «Saıat-Jan» JSHS-na berdi. Kelisimshart boıynsha bizge 28 mıllıon 600 myń teńge aýdarý kerek bolǵan, biraq jumys barysynda qurylystyń shynaıy quny 34 mıllıonǵa shyǵatyny belgili boldy. Biz tapsyrys berýshige aqsha qossyn dep ótinish bildirdik, oǵan olar burynǵy nómir jáne sol merzim boıynsha 26 mıllıonǵa taǵy bir kelisimshart jasasaıyq dep usyndy», — degen eken jýrnalıserge Nurken Aınabekov baspasóz máslıhaty kezinde. Ol osy jaǵdaı úshin úlken shyǵynǵa batqanyn qosa aıtty.
Al prokýratýra málimeti boıynsha, búgin, 22 jeltoqsan kúni saǵat 15:00 shamasynda OQO prokýratýrasy ǵımaratynyń aldynda azamat Nurken Aınabekov eshqandaı talap qoımastan, ózimen birge alyp kelgen janar-jaǵarmaıdy denesine quıyp, jaǵyp jibergen.
«Mańaıdaǵy adamdar dereý kómek berip, otty sóndirdi. Aldyn ala málimet boıynsha, N.Aınabekov ózine qatysty qozǵalǵan qylmysty is boıynsha PB-niń is-áreketine narazylyǵyn bildirgen. Onyń ústinen qylmysty kodekstiń 4 baby boıynsha (alaıaqtyq, qujattardy qoldan jasaý, jala jabý, sóz tasý, t.b) is qozǵalǵan.
2016 jyldyń 18 qarashasynda Ál-Farabı aýdany prokýratýrasymen Aınabekovke qatysty qylmysty is aıyptaý aktisimen sotqa joldanǵan. 2016 jyldyn 12 jeltoqsanda birinshi sot prosesi ótti. Degenmen, sottalýshy Aınabekovtyń qorǵaýshysynyń sotqa kelmeýine baılanysty sot otyrysy 22 jeltoqsanda, saǵat 15:00-ge taǵaıyndalǵan. Qazirgi tańda Aınabekov aýrýhanaǵa jetkizilip, alǵashqy medısınalyq kómek kórsetildi. İstiń mán-jaıy anyqtalyp jatyr. Nátıjesi qosymsha habarlanatyn bolady», — deıdi prokýratýranyń baspasóz qyzmetiniń ókilderi.
Eske salaıyq, 46 jastaǵy er adam Shymkenttegi prokýratýranyń aldynda ózin órtep, saldarynan denesin 40 paıyz kúıik shalǵan. Qazir onyń jaǵdaıy ortasha aýyr dep baǵalanyp otyr.
https://youtu.be/n4HVvARVbj4
