Biylǵy jańa oqý jylynda qalada 20 jańa mektep ashylyp, 2 mekteptiń qosymsha korpýsy aiaqtalyp, apatty mektepter joiylyp, úsh aýysymdy mektep sany 14-ten 9 mektepke azaidy. Jyl sońyna deiin taǵy 4 jańa mektep ashylady.
«Memleket basshysynyń tapsyrmasy aiasynda Shymkent qalasynda bilim berý infraqurylymy qarqyndy damyp keledi, – dedi qala ákimi Murat Áitenov «Turan» shaǵyn aýdanynda salynǵan jańa mekteppen tanysý barysynda.
– Biylǵy jańa oqý jyly Táýelsizdigimizdiń 30 jyldyq mereitoiy qarsańynda bastalǵaly otyr. Táýelsizdik jyldarynda Shymkent qalasynyń bilim salasy úlken jetistikterge jetti.
Osydan otyz jyl buryn qalada 69 myń oqýshysy bar 72 mektep bolsa, qazir 233 myńnan asa oqýshy oqityn 203 mektep bar. Biylǵy jańa oqý jylyn qala mektepteri 233 879 oqýshymen bastady.
Ótken jylmen salystyrǵanda 8 myń oqýshyǵa kóp.
Onyń ishinde 25 myń oqýshy alǵash ret mektep tabaldyryǵyn attap otyr. 2025 jylǵa deiin 72 mektep salý josparlanǵan bolatyn.
Sonyń ishinde 24 mektep biyl qarastyrylǵan, onyń 20-sy oqý jylynyń basynda ashylyp otyr. Sonymen birge 2 mektepke qosymsha korpýs salyndy.
Jyl sońyna deiin taǵy 4 mektep aiaqtalýǵa tiis. Biylǵy jańa oqý jylyn apatty mektepsiz bastap otyrmyz. 2023 jylǵa deiin qalada úsh aýysymdy mektep máselesi tolyq sheshiledi», – dedi ákim óz quttyqtaý sózinde.
Barsha ustazdar men shákirtterdi Bilim kúnimen jáne jańa mekteptiń ashylýymen quttyqtaǵan qala basshysy mektep tabaldyryǵyn alǵash ret attap otyrǵan birinshi synyptyń búldirshinderine sáttilik tilep, olarǵa álippe tabystady.
Ákim balalardyń qaýipsizdigin qamtamasyz etý úshin mektepter video baqylaý júisimen jabdyqtalyp, týrniketter qoiylyp, dabyl batyrmalary ornatylǵanyn, mektepterdiń materialdyq-tehnikalyq bazasyn nyǵaitý boiynsha jumystar júieli túrde júrgizilip keletinin aitty.
Sonymen birge jańa modifikatsiialanǵan jabdyqtarmen qamtamasyz etý maqsatynda 263 kabinet, 178 interaktivti taqta ornatý jumystary júrgizildi. Nátijesinde, jańa modifikatsiialanǵan jabdyqtarmen qamtylǵan pán kabinetter úlesi 32,5%-dan 65%-ǵa jetti. Bul jumystar jalǵasyn tabatyn bolady.
Qala ákimi 1200 oryndyq oqý keshenin ardagerlermen birge aralady. Abai synyby, STEM-kabineti, shahmat buryshy, eńbek sherberhanalarymen tanysty. Qurylystyń sapasy men dizainyna mán bergen Murat Áitenov jańa mektepke oń baǵasyn berip, mektep direktoryna sanitarlyq sharalardyń saqtalýyn qamtamasyz etýdi tapsyrdy.
Aita keteiik, pandemiiaǵa bailanysty alǵashqy qońyraý bilim tabaldyryǵyn alǵash attaǵan búldirshinder úshin ǵana mektep aýlasynda saltanatty jiyn ótti, qalǵan synyp oqýshylaryna sanitarlyq talaptardy saqtai otyryp synyp saǵaty uiymdastyryldy.
