Forým barysynda Qazaqstan Respýblikasy Energetika vitse-ministri Baqytjan Jaqsaliev elimizdegi jańǵyrmaly energiia kózderiniń qazirgi jaǵdaiy jáne damytý joldary jóninde baiandama jasady.
Onyń aitýynsha qazirgi tańda elimizde ekologiialyq qaýipsiz elektr energiiasyn óndirýshi jańǵyrmaly energiia kózderiniń 50 nysany bar. Jalpy qýaty 295,7 MVt, onyń ishinde, shaǵyn sý elektr stantsiialarynyń qýaty 139,8 MVt, jel elektr stantsiialarynyń qýaty 98,2 MVt, kún elektr stantsiialarynyń qýaty 57,3 MVt-ty quraidy.
Óz kezeginde vitse-ministr óńirdiń energetikalyq infraqurylymyn damytý, energoresýrstarmen qamtamasyz etý, elektr energiiasy tarifterin tómendetý zań aiasynda ǵana sheshiletin jetkizdi.
«Ońtústik Qazaqstan oblysynda zańdy tulǵalarǵa arnalǵan elektr energiiasynyń tarifteri elimizdiń basqa óńirlerimen salystyrǵanda eń joǵary deńgeide ekeni ras. Sondai-aq soltústik oblystardan tasymaldanatyn elektr jaryǵynyń qunyn tómendetý men jańa tarifti engizý arnaiy saraptama júrgizý arqyly zań sheńberinde sheshilýi tiis. Sondyqtan uzaq merzimdi baǵdarlama ázirleýde sizderdiń kómekterińiz ushan-teńiz bolaryna senim mol», - dedi Baqytjan Jaqsaliev.
Ońtústik Qazaqstan oblysy boiynsha elektr qýatyna jalpy qajettilik ortasha eseppen saǵatyna 400 MVt quraidy. Onyń 30 paiyzy ishki kózder esebinen alynsa, 70 paiyzdan astam bóligi elimizdiń soltústik óńirlerinen tasymaldanady.
Forýmda energetika salasyna jetekshilik etetin biryńǵai vedomstvo qurý tóńireginde áńgime órbidi. Sebebi bul qyzmetter bólek-bólek, sondyqtan atalǵan salany tekserýmen túrli organdar ainalysady. Bul jumystar bir ortalyqtan júrgizilýi kerek deidi aǵa býyn ókilderi.
«Elimizdi elektr energiiasymen qamtamasyz etýde áli qyrýar is tyndyrylýy kerek. Bul rette atalmysh salany odan ári damytýdyń naqty baǵyttaryn aiqyndaýymyz qajet. Ol birinshiden halyqty arzan baǵaly elektr qýatymen qamtamasyz etýge jol ashsa, ekinshiden el ekonomikasynyń óristeýine múmkindik beredi» - deidi Qazaqstannyń elektr energetikalyq qaýymdastyǵynyń tóraǵasy Shaimerden Orazalinov.
Alqa otyrysy sońynda birqatar ardagerler Qazaqstan elektr energetikalyq qaýymdastyǵy men Ońtústik Qazaqstan oblysy ákiminiń "Qurmet gramotasy", Alǵys hattarymen marapattaldy.
Aita keteiik, Qazaqstan energetikasy salasy ardagerleriniń keńesi 2009 jyly qurylǵan. Atalmysh uiymǵa múshelik etetin aǵa býyn ókilderi sodan beri elimizdiń ár óńirinde bas qosyp, irgetasyn ózderi qalaǵan salanyń búgini men erteńin talqylap keledi.
OQO ákiminiń baspasóz qyzmeti
