Shymkent qalasyndaǵy №1 qalalyq klinikalyq aýrýhanada búirek aýtotransplantatsiiasy sátti júzege asyryldy, dep habarlaidy Dalanews.kz.
Bul – naýqastyń óz búiregin alyp, qaita qalpyna keltirip, óz aǵzasyna qaita otyrǵyzý arqyly jasalatyn asa kúrdeli operatsiia.
1968 jyly týǵan naýqas sońǵy 5 jyl boiy arteriialyq gipertenziiamen aýyrǵan. Sońǵy birneshe jylda qan qysymy únemi 250/140 mm syn.baǵ. jáne odan da joǵary bolyp, bul ómirge asa qaýipti jaǵdaiǵa ákelgen.
Mundai jaǵdaida kez kelgen ýaqytta mi qan tamyry jarylyp, insýlt alý qaýpi óte joǵary bolǵan.
2024 jyly naýqastyń qursaq aortasyna stent-graft implantatsiialanǵan.
Aýrýhanaǵa aýyr halde túsken naýqas tolyq tekserýden ótkizildi. Tekserý nátijesinde sol jaq búirekke baratyn arteriianyń 99% tarylǵany anyqtaldy.
Aortada stent-graft ornatylǵandyqtan, dástúrli shýnttaý operatsiiasyn jasaý múmkin bolmady. Osyǵan bailanysty naýqastyń sol búiregi alynyp, oń jaq myqyn arteriiasyna qaita tigilip ornalastyryldy.
