Shymkent qalalyq sotynyń apelliatsiialyq alqasy ótken jyldyń tamyz aiynda birinshi saty soty salǵyrttyq pen qyzmettik ókilettigin asyra paidalaný derekteri boiynsha 5 jylǵa bas bostandyǵynan aiyrǵan Muhtar Áýezov atyndaǵy Ońtústik Qazaqstan ýniversitetiniń burynǵy rektor mindetin atqarýshysy Qairat Nurmanbetovke qatysty úkimdi ózgertti, dep habarlaidy Dalanews.kz.
Halyqstan málimetinshe, birinshi prorektor bir bap boiynsha tolyq aqtaldy, al ekinshi bap boiynsha jaza merziminiń ótýine bailanysty qylmystyq jaýaptylyqtan bosatyldy.
Qylmystyq is materialdarynda eki jyl aiyrmashylyqpen bolǵan eki epizod tirkelgen.
Alǵashqysy 2022 jyly tender jariialamai memlekettik satyp alý júrgizý faktisine qatysty. Birinshi saty soty 140 mln teńgeniń ishinen 13 mln teńgeden astam qarjy urlanǵan dep tanyp, rektor mindetin atqarýshynyń salǵyrttyqqa jol bergeni jóninde sheshim shyǵarǵan.
Apelliatsiialyq sot bul aiyp boiynsha úkimdi ózgerissiz qaldyrdy, alaida Qairat Nurmanbetov jazadan bosatyldy. Al onyń eki baǵynyshty qyzmetkeriniń jazasy shartty jazaǵa aýystyryldy.
Aiyptaýdyń ekinshi epizody da tender ótkizbei jasalǵan memlekettik satyp alýǵa qatysty boldy. Bul joly sóz 116 mln teńge jóninde. Nurmanbetov basshylyq etken kezeńde ýniversitet bul qarajatqa bas ǵimaratty jóndeýge qajetti qurylys materialdaryn satyp alǵan.
Alaida qylmystyq ister jónindegi sot alqasynyń úsh sýdiasy bul epizod boiynsha qarjy jymqyrý faktisi dáleldenbegen degen qorytyndyǵa keldi. Sottyń sheshiminshe, atalǵan qarajat maqsatty túrde jumsalǵan.
Aita keteiik, keltirilgen materialdyq shyǵyn aiyptalýshylar tarapynan tolyq ótelgen.
Sonymen qatar, qazirgi ýaqytta Qairat Nurmanbetov taǵy bir qylmystyq is boiynsha sot aldynda jaýap berip jatyr. Bul derekterdi Shymkent qalasynyń Ekonomikalyq tergep-tekserý departamenti jeke is retinde bólip shyǵarǵan.
Qylmystyq is materialdaryna sáikes, jymqyrý somasy 320 mln teńgeden asqan. Tergeý dereginshe, qarjy birneshe ese qymbat baǵamen júrgizilgen satyp alýlar arqyly shyǵarylǵan. Máselen, naqty quny 200 myń teńge turatyn keńse oryndyǵy qujat júzinde 20 mln teńge dep kórsetilgen.
