Aımaq basshysy bul jańalyq jýyrda ǵana mıllıondy qala atanǵan shahar úshin úlken syı bolǵanyn jetkizdi.
– Elimizde jalpy 3 zoosaıabaq bolsa, sonyń biri bizdiń oblysta ornalasqan. Osy nysandy jańǵyrtý maqsatynda byltyr zoobaqta qaıta qurý jumystary bastalǵan bolatyn. Merdigerler ózine tapsyrylǵan mindetti oryndap, jumysty jospar boıynsha aıaqtap otyr. Bizdiń baqtyń ózge zoobaqtardan ereksheligi qaıta qurýdan soń paıdalanýǵa berilgen «Afrıka» kontıngentindegi pavılondar ashyq tabıǵı ortaǵa beıimdelgen. Mereke nemese demalys kúnderinde zoobaqqa keletin turǵyndar sany az emes. Endi búgingi «Afrıka» aımaǵy ashylǵan soń qydyrýshylar sany burynǵydan da kóbeıedi dep senemiz! – dedi Janseıit Qanseıituly.
Sondaı-aq, óńir basshysy Elordamyz – Astana qalasynyń 20 jyldyǵyna Shymkent qalasynyń mıllıon turǵyndary atynan Astana qalasyna janýardyń 20 túrin syıǵa tartatynyn atap ótti.
Elordaǵa Shymkentten arystan, Amýr jolbarysy, pýma, qońyr aıý sekildi jyrtqyshtar men kezquıryq, tilemish, tazqara, úki qustary jáne basqa da janýarlar tartý etilmek.
Jalpy «Afrıka» zoologıalyq aımaqtyq qurylys jumysy ótken jyldyń sáýir aıynda bastalǵan. Jobanyń quny 627 114 myń teńgeni quraıdy.
Aıta keteıik, Shymkent zoobaǵy 1980 jyly qurylǵan. Zoobaqtyń maqsaty - sırek kezdesetin jáne joıylyp jatqan jan-janýarlardy saqtap, olardy kóbeıtý. Qurylǵan kezde zoobaqta 75 túrli ań bolsa, búginde 249 túrli 2 565 janýarǵa jetken.
Sondaı-aq, munda jyl saıyn kelýshiler sany da artyp keledi. Máselen, 2017 jyly kelýshiler sany 426 myńǵa jetse, osy jyldyń 3 aıynda 60 myńnan astam adam kelgen. Zoobaqtyń jalpy aýmaǵy 29 gektardy quraıdy. Onyń 19 gektary túrli ekspozısıaǵa arnalǵan. Shymkent zoobaǵy EARAZA-nyń múshesi (Eýrazıalyq akvarıýmder men zoobaqtar assosasıasy).
