Shymkenttegi munai óńdeý zaýytynyń óndiris qýatyn kóbeitý 2029 jyldan 2030 jylǵa jyljytyldy. 23 mamyr kúni Energetika ministrligi, «QazMunaiGaz» AQ («Samuryq Qazynanyń» enshilesi), «PetroKazahstan Oil Prodakts» JShS (PKOP, «QMG» enshilesi) men CNPC ókilderi zaýyttyń óndiris qýatyn jylyna 12 mln tonnaǵa jetkizý jobasyna qatysty jinalys ótkizgen. Jańa obektiler 2030 jyly iske qosylady.
Jalpy alǵanda buǵan deiin ministrlik Shymkent MÓZ-iniń óndiris qýatyn aldymen 9 mln tonnaǵa, odan 12 mln tonnaǵa jetkizý týraly jospar baryn habarlaǵan edi. Merzim 2029 jylǵa qarai dep aitylǵan. Jyl saiyn tutynýshylar kóbeiip kele jatqandyqtan, dál sol jylǵa qarai motor otyny qaitadan tapshy bolyp qalýy múmkin.
PKOP — Ortalyq Aziiadaǵy eń iri munai óńdeý zaýyttarynyń biri. Óndiris qýaty — jylyna 6 mln tonna. Eldiń qajetin, ásirese, motor otynymen qamtamasyz etip otyr. Jaýapty ministrlik múddeli memlekettik organdarmen birlese otyryp Qazaqstan men Qytai arasynda úkimetaralyq kelisim jobasyn daiyndaǵan. Onyń ishinde shikizat, infraqurylym jáne energoresýrstarmen qamtamasyz etý, halyqaralyq standarttardy qoldaný jáne áleýetti investorlardyń qarsy mindettemelerin usyný máseleleri qaralǵan. Aldyn ala jasalǵan esep boiynsha, joba iske asyrylsa, avtobenzin óndirisin — 700 myń tonnaǵa, áýe otynyn — 700 myń tonnaǵa, dizel otynyn — 3,9 mln tonnaǵa deiin ulǵaitýǵa bolady.
Shymkent qalasynyń ákimi Ǵabit Syzdyqbekov pen PKOP prezidenti Erbolat Qojabaev byltyr jyl sońynda zaýyttyń óndiris qýatyn 6 mln tonnadan 12 mln tonnaǵa ulǵaitý jobasyndaǵy basty máselelerdi sheshetin jol kartasyna qol qoiǵan. Sonyń ishinde jańa jobaǵa kerek jer telimderin bólý jáne óndiristik-tehnologiialyq qajetterge sý úzdiksiz berip otyrý máselesi qamtylǵan.
