Ádilethan Moldahanǵa qatysty sot otyrysynda jýrnalister otyrǵan kabinettiń esigi jabylyp qalǵany aityldy. Bul týraly jýrnalist Rýslan Ótepbai málimdedi, dep habarlaidy dalanews.kz.
Onyń sózinshe, Almaly aýdanaralyq sotynyń qyzmetkerleri BAQ ókilderiniń kásibi qyzmetine kedergi keltirgen.
"Almaly aýdanaralyq sotynyń qyzmetkerleri jýrnalisterdiń quqyǵyn shektep, bizdi sot ǵimaratynan shyǵarmai, kásibi qyzmetimizge kedergi keltirdi. Bul jaǵdai keshe de bolǵan, búgin taǵy qaitalandy. Bizdińshe, munyń maqsaty – jýrnalisterdiń Ádilethannan suhbat alýyna múmkindik bermeý. Eger sot qyzmetkerleri zań buzsa, olardy kim jaýapqa tartady?" – dep jazdy Rýslan Ótepbai.
Búgin bloger ári zańger Ádilethan Moldahanǵa qatysty úkim shyǵarylady.
Ádilethan Moldahan – qazaqstandyq zańger, bloger jáne burynǵy politsiia qyzmetkeri. Ol áleýmettik jelilerde jol qozǵalysy erejeleri, quqyqtyq máseleler jáne qoǵamda qyzý talqylanǵan oqiǵalarǵa qatysty pikirlerimen tanylǵan. Sonymen birge quqyqtyq keńester berip, qoǵamdyq máselelerge qatysty pikir bildirip júrgen.
2026 jyldyń naýryz aiynyń sońynda Ádilethan Moldahan Almatyda adam ólimimen aiaqtalǵan jol-kólik oqiǵasyna bailanysty áleýmettik jelide jariialaǵan jazbalarynan keiin ustaldy.
Keiin oǵan Qylmystyq kodekstiń 274-baby 2-bóligi 3-tarmaǵy boiynsha, iaǵni "kórineý jalǵan aqparat taratý" deregimen aiyp taǵyldy. Is boiynsha jábirlenýshi retinde Almaty qalalyq politsiia departamentiniń burynǵy basshylyǵyndaǵy eki ókil tanylǵan.
