Aıta keteıik, Shymkent munaı óńdeý zaýyty bıylǵy jyldyń maýsymynan bastap Keden odaǵynyń tehnıkalyq reglamentiniń talaptary boıynsha K-4, K-5 ekologıalyq klastaǵy joǵary oktandy benzın shyǵarýdy qolǵa alǵan bolatyn. Bul mundaǵy jańǵyrtý jumystarynyń 1-shi kezeńiniń jemisi. Endi zaýyttaǵy jańǵyrý jumystarynyń 2-shi kezeńi 2018 jyldyń qyrkúıeginde aıaqtalady dep josparlanýda. Nátıjesinde joǵary oktandy benzın óndirý kólemi jylyna 652-den 2 270 myń tonnaǵa deıin, dızel otyny - 1 192-den 1 916 myń tonnaǵa deıin, avıaotyn – 254 -ten 400 myń tonnaǵa deıin ósedi. Zaýytta joǵary oktandy avtobenzınderdi óndirý úlesi 100% quraıtyn bolady. Premer–mınıstr zaýyttaǵy qaıta qurylymdaý jumystaryn ýaqtyly aıaqtaýǵa jáne Qazaqstan naryǵyn joǵary sapadaǵy motorlyq otyndarmen qamtamasyz etýge qatysty birqatar tapsyrmalar berdi.
Úkimet basshysy budan keıin Shymkent qalasyndaǵy «Ońtústik» ındýstrıaldy aımaǵynda ornalasqan kásiporyndardy aralap kórdi. Jumysshy top shyny buıymdar shyǵaratyn «Evrokrıstall» zaýyty bolyp, óndiristik prosespen jáne daıyn ónim túrlerimen tanysty. Aıta keteıik, kásiporynda túrli qalypta, syıymdylyǵy 200 ml-den 3 lıtrge deıingi tússiz jáne jasyl tústi bótelkeler men qutylar ázirlenedi. Osynaý ónimderge Qazaqstannyń barlyq aımaǵy men Qyrǵyzstannan tapsyrystar kelip túsýde. Jylyna 200 mln dana shyny quty shyǵarýǵa qaýqarly kásiporynda 350 adam jumyspen qamtylǵan. Kásiporyn jumysymen tanystyrǵan seriktestiktiń bas dırektory Rýstam Sýhov búginde zaýyt jumysynyń 95 paıyzy avtomattandyrylǵanyn jáne jumys isteý aıasyn keńeıtip, kómirqyshqyl gazyn óndirýdi qolǵa alǵanyn atap ótti.
Baqytjan Saǵyntaev bastaǵan delegasıa keramogranıt óndirisimen aınalysatyn «Zerde-Keramıka» kásipornynda bolyp, elimizde balamasy joq zaýyttyń ónim túrlerimen tanysty. Kásiporyn jyl sońynda óndiristiń ekinshi jelisin iske qosyp, ónim kólemin 2 mıllıonnan 4,5 mln sharshy metrge deıin jetkizýdi josparlaýda. Joba ımportty almastyrý baǵytynda jumys isteıdi. Munda eksporttyń úlesi 30 paıyz bolsa, qalǵan 70 paıyzy elimizdiń ózge oblystaryna jóneltilýde. Óndiristegi ıtalándyq avtomattandyrylǵan júıe bar sharýany – quraýysh shıkizattardy aralastyryp, daıyn ónimdi qaptaýǵa deıin atqara alady. Al tehnıkanyń qyzmetin 140 adam qadaǵalap otyrady. Al mundaǵy shıkizattyń 60 paıyzy jergilikti bolsa, 40 paıyzy shetelden tasymaldanady.
Aıta keteıik, búginde «Ońtústik» ındýstrıaldy aımaǵynda jalpy somasy 55,8 mlrd teńge bolatyn 85 joba júzege asyrylýda. Bes myń jumys orny ashylǵan. Búginde quny 21,4 mlrd teńge bolatyn 46 jobasy iske qosylyp, úsh myń adam jumyspen qamtylyp otyr.
OQO ákiminiń baspasóz qyzmeti
