Áleýmettik jelilerde "Shymbulaq" kýrortynyń taǵdyryna qatysty qyzyq derek shyqty, - dep habarlaidy Dalanews.kz.
FBRK Telegram-arnasy óz derekkózderine silteme jasap, keibir aqparattardy jariialady. Oǵan súiensek, keiingi ýaqytta iri kásipkerler "Shymbulaq" taý shańǵysy kýrortyn satyp alýǵa nietti ekeni týraly aqparat paida bolǵan. Arna mámile kezinde tiisti zańdar saqtalmaýy jáne kýrort tómen baǵaǵa satylýy múmkin ekenin jazdy.
"Munyń bári osydan 15 jyl buryn "Shymbulaq" basshylyǵy aýqymdy jobany júzege asyrýǵa niettengendikten bastalǵan. Medeýde meiramhanalary men kafeleri bar Radisson qonaqúii, al Shymbulaqta 8 qabatty qonaqúi men páterler salý josparlanǵan. Buǵan 1,37 mlrd kóleminde investitsiia tartý kútilgen. Qurylys kezeńi tórt jylǵa eseptelgen (2007 jyldan 2010 jylǵa deiin).
Málimetter boiynsha jobany iske asyrý úshin "Shymbulaq" ákimshiligi eki iri nesie alǵan. Kreditorlardyń biri "Qazkommertsbank"("QAZKOM") bolǵan. Ol jumystyń birinshi kezeńin jartylai qarjylandyryp, shamamen 100 million dollar investitsiialaǵan", - dep jazdy Telegram-arna.
Al jańa salynatyn nysandardan túsken aqshadan keiin nesie tólenýi kerek bolǵan.
"Qazaqstanda 2011 jyly VII Qysqy Aziia oiyndaryna daiyndyq bastalyp, "Aziadaǵa" taý shańǵysy nysandaryn qaita qurý jáne salý boiynsha barlyq jumys memleket esebinen júzege asyryldy.
2011 jylǵy Aziada qarsańynda "Medeý" jáne "Shymbulaqty" qaita qurý jobasynyń bastamashysy taý shańǵysy kýrortynyń iesi "Capital Partners" kompaniiasy boldy. Capital Partners developerlik kompaniiasynyń ieleriniń biri - Serjan Jumashev, oǵan kompaniianyń 60 paiyzy tiesili, aktsiialardyń qalǵan 40 paiyzy túrik kásipkeri Býrak Oimenniń ieliginde", - dep jazylǵan Telegram-arna málimetinde.
Alaida keiin eshkim nesie boiynsha esep aiyrysýǵa asyqpaǵan. 2017 jyldan bastap talap etý quqyǵy "Problemalyq nesieler qoryna" ótken. 2022 jyly ol áleýetti investorǵa "Chimbulak Development" JShS jáne "Alataý Holding" JShS qaryz alýshylaryna qoiylatyn talap quqyǵyn berýge daiyn bolypty jáne "Shymbulaq" úshin áleýetti investorlar izdeý týraly birneshe ret habarlandyrý jariialaǵan. Alaida taý shańǵysy kýrortyna aqsha quiǵysy keletinder tabylmaǵan.
"Búgingi tańda "Chimbulak Development" JShS quryltaishylary - Erjan Erkinbaev jáne Nurlan Tilepovke tiesili "Chimbulak Investments" JShS. Erjan Erkinbaev "Medeu Management" JShS-na da ielik etedi.
Nurlan Tilepovke tiesili "Chimbulak Investments" JShS 2017 jyldan bastap bar bolǵany 15 myń teńge salyq tólegen. Tilepov 650 million teńgege jýyq somaǵa salyq bereshegi bar "Si Pi Rezidenshial Atyraý" JShS jáne 51 mlrd teńgege "First Heartland Jusan Bank" AQ aldynda boryshy bar "Kapital Propertis" kompaniiasy" JShS-na ielik etedi", - dep jazylǵan derekte.
Sonymen qatar, arna málimetinshe, "Chimbulak Development" JShS burynǵy bas direktory Erjan Erkinbaev suhbattarynyń birinde kýrorttyń qyzmet kórsetý infraqurylymy óte qymbat ekenin, fizikalyq turǵydan kýrort kelýshilerdiń munsha kóp sanyn qabyldai almaitynyn, bul rette dollarlyq qaryz tek ósip kele jatqanyn aitqan. 2019 jylǵy tamyzdaǵy jaǵdai boiynsha "Shymbulaqtyń" boryshy trillion teńgeden asyp ketken.
Al "Alataý Holding" JShS quryltaishylary - Ravil Musaev pen Ernar Bekbolatov.
"Bul kompaniialar men olardyń ieleriniń tólem qabilettiligin eskere otyryp, "Problemalyq kreditter qory" "Shymbulaq" nesiesin ózine alǵany tańǵalarlyq jaǵdai emes. Sonymen qatar, 2023 jyldyń jazynda Ile-Alataý ulttyq parki aýmaǵynyń edáýir bóligi Almaty ákimdigine berilýi múmkin ekeni týraly aqparat paida boldy. Bul jerlerge Býtakovka jáne Alma-Arasan shatqaldary, Medeý jáne Shymbulaq kiredi", - dep jazylǵan arna málimetterinde.
Keiin ákimdik týristik áleýetti arttyrý maqsatynda aýmaqtyń bir bóligin alý jospary baryn rastapty. Al bul ýaqytta ekologiia ministri Erlan Nysanbaev alańdaýǵa eshqandai sebep joǵyn aityp, ulttyq park jerlerin berýdiń arqasynda osy aýmaqta ekotýrizmdi qarjylandyrý men damytý jaqsaratynyna sendirgen.
"Ekologtar ulttyq park aýmaǵyna týristik nysandar men jańa taý kýrorttary salyna ma dep qorqyp, aýmaqtyń mártebesin ózgertý onyń qorǵanys mártebesin de tómendetedi dep alańdaidy. "Shymbulaq" taý shańǵysy kýrorty jańa ielerine satylsa, mundai jaǵdai bolýy ábden múmkin. "Shymbulaq" jańa iesine qandai sharttarmen beriletini belgisiz", - dep jazdy FBRK Telegram-arnasy.
