Aǵymdaǵy jyldyń 10-14 qazanynda Bozanbai aýylynyń mańynda «Búrkit tóbe» alańynda dástúrli «Shyǵys salburyny» halyqaralyq búrkitshi festivali ótedi, – dep habarlaidy Dalanews.kz ShQO ákiminiń baspasóz qyzmetine silteme jasap.
Shyǵys Qazaqstan oblysynyń ákimi Ermek Kósherbaev festival daiyndyǵyn baǵamdap qaitty.
«Shyǵys Salburyny» festivaline respýblikanyń basqa oblystarynan, sonyń ishinde shet elderden, atap aitqanda búrkitshi federatsiiasynan, Mońǵoliiadan, Vengriiadan, Reseiden, Ispaniiadan, QHR-dan 130-dan astam ókil qatysady.
Negizgi is-sharalar 11-12 qazanǵa josparlanǵan, al kútip otyrǵan qonaqtar sany 4000-nan 5000-ǵa deiin jetedi. «Búrkit tóbe» alańynda kiiz úi qalashyǵy (20-dan astam kiiz úi) ornalasady, onda týristerdi búrkitter men suńqarlardyń qyzyqty saiystary ǵana emes, sondai-aq, kóptegen oiyn-saýyq (túiemen syrǵanaý, altybaqan, sadaq atý t.b.) kútetin bolady.
Oblys ákiminiń aitýynsha, Shyǵystyń týristik brendine ainalyp, dástúrli túrde ótip otyrǵan atalmysh festival jyl saiyn aýqymyn keńeitip, deńgeiin órlete túsýi tiis.
Festivaldiń barlyq qonaqtaryna óńirdiń tanymal gastrofirmalarynan tamaqtaný uiymdastyrýdy kózdep otyr. Jarys baǵdarlamasyna túrli sanattaǵy búrkitter men suńqarlar saiysy, «tazy» tuqymyndaǵy júirik itterdiń jarysy, «jamby atý» jáne «teńge ilý» dodalary kiredi.
Sonymen qatar, festival aiasynda ShQO-nyń aýdandary men qalalary halyq shyǵarmashylyǵy men ulttyq taǵamdar, sýsyndar jáne bal-panta siiaqty jergilikti ónimderdi tanystyrý maqsatynda jappai qatyspaq.
