Elorda kúni qarsańynda Astanada «Merekelik saiabaq» qalalyq festivali bastaldy, dep habarlaidy dalanews.kz.
Merekeniń alǵashqy alańy retinde Óner mýzeii tańdaldy. Munda qala turǵyndary men qonaqtaryna Ashyq esik kúni, sheberlik saǵattary jáne Ulttyq dombyra kúnine arnalǵan mádeni baǵdarlama usynyldy.
Qonaqtar qazaqtyń ulttyq mýzykalyq aspaptarymen tanysyp, olardyń tarihy, jasalý erekshelikteri men únindegi qasietteri týraly málimet aldy.
Uiymdastyrýshylar kiiz úi men dombyra jasaýdan, jetigen, sazsyrnai jáne ózge de ulttyq aspaptarda oinaýdy úiretetin sheberlik saǵattaryn ótkizdi. Sonymen qatar ulttyq oiyndar, fleshmob jáne tanymdyq is-sharalar uiymdastyryldy.
Óner mýzeiiniń basshysy Baiandy Sahariiaulynyń aitýynsha, is-sharanyń maqsaty – elorda turǵyndary men qonaqtaryn ulttyq mýzykalyq aspaptarmen tanystyryp, dástúrli murany zamanaýi formatta nasihattaý.
«Bizdiń mýzei mýzykalyq aspaptardy jasaý jáne qalpyna keltirýmen ainalysady. Mýzei janynda etnograf Bolat Sarybaev atyndaǵy ǵylymi-zertteý zerthana-sheberhanasy jumys isteidi. Onda ǵalym-etnograftardyń eńbekterine súiene otyryp, umyt qalǵan kóne aspaptardy qaita jańǵyrtamyz. Búgin sol aspaptardy kópshilikke usynyp, sheberlik saǵattaryn ótkizip, sheberlerdiń jumys tásilderin kórsettik.
Dombyraǵa erekshe nazar aýdardyq. Munda qazaqtyń kórnekti tulǵalary paidalanǵan aspaptardyń dál kóshirmelerin kórýge bolady. Ol úshin mýzei qoryndaǵy úlgilerdi, fotosýretterdi, ólshemderdi zertteimiz, sondai-aq aspap ieleriniń urpaqtarynda saqtalǵan málimetter men materialdarǵa júginemiz. Bizdiń maqsatymyz – ulttyq bolmysty zamanaýi formatta jetkizip, bul murany búgingi tyńdarmanǵa túsinikti ári qyzyqty etý», – dedi ol.
Merekelik baǵdarlamanyń qonaqtarynyń biri – Qazaqstanǵa alǵash ret kelgen Italiia azamaty Daniel boldy. Onyń aitýynsha, ol bir kún buryn Óner mýzeiine kelip, aldaǵy is-shara týraly bilip, qaita oralýdy jón kórgen.
«Maǵan mýzyka men mýzykalyq aspaptar óte qyzyq. Qazaqstandyq mýzykant dostarym bar, sondyqtan qazaq mýzykasyn burynnan estip júrmin. Keshe mýzeige kelip, búgin munda osyndai is-shara ótetinin bildim de, qaita keldim. Maǵan kontsertti tyńdap qana qoimai, aspaptardy jaqynnan kórip, olardyń qalai jasalǵanyn jáne qandai materialdardan daiyndalǵanyn bilý múmkindigi unady. Batys mýzykanttary úshin bul aspaptardyń kóbi beimálim, sondyqtan bul men úshin óte qundy tájiribe boldy», – dedi sheteldik qonaq.
Festivaldiń negizgi baǵdarlamasy 5 jáne 6 shilde kúnderi Astananyń Ortalyq saiabaǵynda jalǵasady. Qala turǵyndary men qonaqtaryna ulttyq naqysh pen zamanaýi ónerdi ushtastyrǵan art-nysandar galereiasy, strit-art aimaǵy, balalarǵa arnalǵan interaktivti alańdar, ekologiialyq oiyndar, qolóner jáne shyǵarmashylyq sheberlik saǵattary usynylady.
Sonymen qatar festival aiasynda qazaqstandyq animatsiialyq filmder kórsetilip, animatorlar men ertegi keiipkerleriniń qatysýymen oiyn-saýyq baǵdarlamalary, otbasylyq kraft-oiyndar, sporttyq jáne komandalyq belsendilikter, shyǵarmashylyq alańdar men ashyq aspan astyndaǵy mýzykalyq kontsertter uiymdastyrylady.
