ShQO ákimi Danial Ahmetov Alakóldiń jaǵalaýynda týrizmdi damytýdy erekshe baqylaýǵa aldy. Ákimniń tapsyrmasymen qurylǵan jumys toby sanitarlyq-epidemiologiialyq jáne órtke qarsy qaýipsizdik talaptarynyń buzylý faktilerin kóptep anyqtady. Munymen qosa 80 nysan boiynsha sáýlet, qalaqurylysy talaptarynyń oryndalmaǵany belgili boldy. Tekseristiń qorytyndylary boiynsha aýdandyq ákimdik árbir kásipkermen anyqtalǵan kemshilikterdi kelesi demalys maýsymy bastalǵanǵa deiin joiý týraly memorandým bekitti. Óz qyzmetterin zań talaptaryna sáikestendirýmen qatar kásipkerler ielikterindegi nysandardy abattandyryp, demalýshylarǵa qolaily jaǵdai jasaityn bolady.
Bastysy, Alakóldiń jaǵalaýynda týrizmdi damytý máselesin keshendi sheshý maqsatynda oblys ákiminiń tapsyrmasyna sáikes tiisti infraqurylymdy qura otyryp, demalys aimaǵyn abattandyrýdyń jobasy daiyndaldy.
Danial Ahmetovtiń tóraǵalyǵymen Úrjar aýdanynda ótken arnaiy keńestiń barysynda joba kópshilikke usynylyp, bekitildi. Oǵan sáikes kelesi jyly Alakólge aparatyn joldarǵa ortasha jóndeý jumystary júrgizilip, jaǵalaý men jaǵajailar abattandyrylmaq, kóldiń jaǵalaýynda saiabaq ashylyp, sporttyq jáne attraktsiondary bar balalardyń oiyn alańdary salynbaq. Sonymen qatar, avtobeket aýmaǵy abattandyrylyp, 200 oryndyq avtoturaq jasaqtalmaq. Úrjar aýdanynyń ákimi Serik Zainýldin kózdelgen jumystar 2017 jyldyń 1 shildesinde aiaqtalady dep sendirdi.
– Men osy aýdanda jumys isteitin azamattardyń óz mindetterin oryndap, Alakóldiń mańaiyn abattandyrý boiynsha tiisti jumystardy atqaryp, demalýǵa kelgen adamdarǵa qolaily jaǵdai jasaidy dep senemin. Alakóldi Shyǵys Qazaqstannyń maqtanýǵa turarlyqtai kórikti aimaǵy etýge alǵash ret biýdjetten arnaiy qarjy bólinýde, – dedi keńesti qorytyndylaǵan Danial Ahmetov.
