Almatyda ótken Internet-taýarlar (Internet of things) salasyndaǵy forýmda sharaǵa qatysqan qaýym osy saýalǵa jaýap izdedi.
"Shevron" kompaniiasynyń qoldaýymen Makerspace Almaty shyǵarmashylyq ortalyǵy uiymdastyrǵan sharada múmkindigi shekteýli jandardyń ómirin jeńildetý úshin qandai innovatsiialyq sheshimder qabyldanýy kerektigi sóz boldy.
– Biyl Shevronnyń Qazaqstanǵa kelgenine 25 jyl toldy. Osy jyldar ishinde qoǵamdaǵy kómekke muhtaj túrli toptardyń áleýmettik máselelerin sheshýge tyrystyq.
Shevron sonymen qatar STEM (science, technology, engineering and mathematics) baǵdarlamasyn belsendi túrde damytýda.
Osy jobanyń arqasynda jańa tehnologiialardyń qoǵamdyq ómirge kirigip, halyqtyń qajetine jaraýyna septestik. Bul baǵytta qoǵam ómirin ózgertetin innovatsiialyq jobalary bar jastarǵa qoldaý kórsettik, – deidi "Shevron" kompaniiasynyń ókili Janar Qoshpanova.
Onyń aitýynsha, Internet-taýarlar (Internet of things) salasyndaǵy forýmdy uiymdastyrýdaǵy maqsat –jastar arasynda ǵylymǵa degen qyzyǵýshylyqty oiatý jáne osynyń nátijesinde qoǵamnyń qajetine jaraityn alǵashqy prototip ázirleý.
Sharanyń qorytyndysynda 20 komandanyń ishinen úzdik atanǵan 3 ujymnyń jobalary iriktelinip alyndy.
Bulardyń árqaisysy "Shevron" kompaniiasynyń tarapynan óz jobalaryn jetildirý úshin 500 dollar kóleminde syiaqy aldy.
Úzdik atanǵan jobalardy atap óte ketsek:
Erjan Qabdyqaiyrov pen Bernar Saparáli estý qabileti nashar adamdarǵa arnap Vibelace atty innovatsiialyq alqa jasap shyqqan. Qurylǵynyń tórt taraptan aqparat qabyldaityn qabileti bar. Osy arqyly adam dybystyń qai tustan shyqqan dál ajyrata alady.
Ónertapqyshtardyń aitýynsha, innovatsiialyq alqa estý qabileti tómen adamdardyń kúndelikti júris-turysyn jeńildetýge taptyrmaityn qural.
Al Dana Erlanova men Dilnaz Qamalova ázirlegen Sequence qurylǵysynyń Altsgeimer aýrýyna shaldyqqan naýqastarǵa qai kezde, qai ýaqytta dári-dármek qabyldaý qajettigin eske salyp turatyn ereksheligi bar. Bul qurylǵynyń taǵy bir qundylyǵy – adam alysqa saparǵa shyqqan jaqyndaryn kez-kelgen ýaqytta baqylap, olarmen habar almasa alady. Jobanyń pishini – "aptechkaǵa" uqsas ári mobildi qosymshanyń kómegimen basqarýǵa bolady.
Oqjetpes Ýálihanov pen Esentai Qurmanbaidyń jobalary kórý jáne estý qabileti nashar adamdarǵa arnalǵan. Qosymsha Siri dybys kómekshisi arqyly basqarylady. Osy arqyly úi ishilik jumystardy atqarýǵa múmkindik týady.
– Bul qurylǵy sonymen qatar kórý qabileti tómen adamdardyń tarazydan jelinbeýine kómektesedi. Kóp jaǵdaida mundai jandardy bazardaǵy saýdagerler san soqtyryp ketetini ótirik. Osy qosymshany paidalanyp qaltasyndaǵy qarajatyn saqtai alady, – deidi Oqjetpes Ýálihanov.
Al "Shevron" kompaniiasy óz kezeginde qoǵamnyń igiligine jaraityn jobalary bar jas ónertapqyshtardy ári qarai da qoldaýdy jalǵastyra bermek.
