Marqum Sherzat Bolattyń otbasynyń advokaty Meiirman Shekeev Qarjaýbai Nurymovtyń otbasy úshin salynyp jatqan jańa úidiń qurylys barysyn kórsetti, dep habarlaidy Dalanews.kz.
Advokattyń aitýynsha, úidiń qurylysy biyl qazan aiynyń ortasynda tolyq aiaqtalady.
“Kópshilik Qarjaýbaidyń órtengen úiiniń jaǵdaiy qandai degen saýaldy jii qoiady. Buǵan deiin nazarymyz sot protsesinde bolǵandyqtan, aqparat bergen joqpyz. Qazir kózimiz jetip otyr – jańa úi boi kóterip jatyr. Qurylysshylar 15 qazanǵa deiin tolyq aiaqtaitynyn aitty”, – dedi Shekeev.
Qurylysqa úles qosqan azamattardyń biri – Asqar esimdi turǵyn. Ol óziniń kómegi jaily jariia etýdi qalamaǵanymen, advokat oǵan alǵysyn bildirdi. Sondai-aq Almaty oblysy ákimdigi qurylys protsesin baqylap, qujattaryn rásimdep, úidi tolyq daiyn kúiinde tabystaýǵa ýáde bergen.
“Men úshin ýáde — QR Azamattyq kodeksiniń talaptaryna sáikes mindetteme, al mindettemeden bir jaqty bas tartýǵa jol berilmeidi. Ol sottaǵy jaýapkershilik”, – dep atap ótti Meiirman Shekeev.
Budan bólek, advokat áleýmettik jelide kómek kórsetip jatqan Asarume jobasynyń jetekshisi Ashat myrzaǵa jáne ózge de qoldaý bildirgen jandarǵa rizashylyǵyn bildirdi. Onyń aitýynsha, úige áli de turmystyq qajettilikter, iaǵni gaz peshi, perdeler jáne basqa da jabdyqtar qajet. Shekeev qaiyrymdylyq tanytyp, kómek qolyn sozǵysy keletinderden usynystar qabyldaitynyn jetkizdi.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵannan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
Jýyrda osy is boiynsha sot sheshimi shyqty. Tergeý málimetinshe, Sherzatqa pyshaq jaraqatyn salǵan basty aiyptalýshy Abzal Shynasyl 23 jylǵa bas bostandyǵynan aiyryldy. Ravil Sakiev 20 jylǵa sottaldy.
Qalǵan aiyptalýshylar 7 jyldan 15 jylǵa deiin bas bostandyǵynan aiyryldy. Kámeletke tolmaǵan Y.D. 1,5 jylǵa bas bostandyǵynan aiyryldy.
