DALA INSIDE telegram arnasynyń habarlaǵanyndai Ishki ister ministri Erjan Sádenov osy maqsatta Brússelge baryp qaitqan.
Eýroodaqtyń migratsiia jónindegi direktorat tóraǵasy Iohannes Lúhnermen júzdesken Sádenov Shengen vizasyn jumsartyp, Batys elderiniń Qazaqstanǵa jyly qabaq tanytýyn suraǵan.
Alaida almaqtyń salmaǵy da bar. Eýropaǵa emin-erkin kirý úshin Brússeldiń standartyna sai reforma júrgizýge, sonyń ishinde kóshi-qon saiasatyn jetildirýge mindettimiz.
"Bizshe jetken málimet boiynsha Sádenov Lúhner myrzaǵa eldegi migratsiialyq ahýal týraly aqparat berip, «jumyssyz qazaqtardyń Eýropaǵa aǵylmasyna» kepildik etken.
Shengen vizasynyń talap-shartyn jeńildetý Qazaqstannyń Batysqa bet burýyna jol ashatyn faktor ekeni ashyq aitylǵan.
Shengen aimaǵyna erkin kirer bolsaq, «Qazaqstanǵa sanktsiia salynady» degen 🇷🇺 Resei propagandasynyń aýzyna qum quiylyp, álgindei áńgimeler sap tyiylar edi. Dese de, EO sheneýnikteri buǵan qatysty pozitiv jaýap qatýǵa asyǵar emes. Brússeldegi biýrokrattar «mundai táýekelge barýdyń qajeti bar ma, joq pa» degen saýaldyń tóńireginde on oilanyp, júz tolǵanýda. Bulardyń arasynda qazaq biligimen sóz bailasyp, «Shengenniń sharýasyn sheship berýge» ýáde etken lobbister de otyr", - dep jazady DALA INSIDE.
Al Lúhner óz tarapynan vizalyq protsesti ońtailandyrý boiynsha jan-jaqty analiz júrgizý kerektigin aitqan. Analiz aiaqtalǵasyn, eki taraptyń ókilderi ústel basyna jinalyp, Shengen boiynsha sheshim qabyldaidy.
Sádenov osy máseleni alǵa tartyp, Brússeldiń bosaǵasyn tozdyrǵan alǵashqy shendi emes. Buǵan deiin Eýroodaqtyń ishki máseleler jónindegi komissary Ilva Iohanssonmen júzdesken Murat Nurtileý de Shengenniń jaiyn sóz etken edi. Syrtqy ister ministri viza alýdaǵy qyrýar qaǵaz-qujattyń sanyn azaityp, viza berýdiń protsessin jedeldetý kerektigin jetkizgen.
«Shengen aimaǵyna kirgisi keletin Qazaqstan azamattary biýrokratiialyq kedergilerge shyrmatylyp, altyn ýaqytyn joǵaltady », - dep muńyn shaqqan bolatyn Nurtileý.
Eýropany sharlaǵysy keletin qazaqtar aldymen viza alýǵa qajetti ótinish jazýy tiis. Keiin týristik polis satyp alady, artynsha úi-jaiy bar ekenin rastaityn qujat ótkizedi, budan ózge de mashaqaty jetip artylady.
Ózekti aqparatpen bólisetin DALA INSIDE telegram arnasyna tirkelýge keńes beremiz: https://t.me/dalainside
https://dalanews.kz/news/93773-sot-deputat-turlykhanovtyng-ulyna-qaty
