Keiingi kezde Qazaqstan Respýblikasynyń memlekettik shekarasynan Qytai Halyq Respýblikasynyń ulty qazaq azamattarynyń zańsyz ótý faktileri oryn alýyna bailanysty qoǵamda «Shekarashylarymyz buǵan nege jol berdi?» degen saýal týyndap otyr.
Osy suraqqa jaýap izdei kele, men taiaýda Soltústik Qazaqstan oblysy men Omby oblysynyń arasyndaǵy Qazaqstan-Resei memlekettik shekarasyna arnaiy baryp-qaittym.
Túigen pikirim: memlekettik shekarany buzýshylardy der kezinde ustai almaǵan Ulttyq qaýipsizdik komiteti Shekara qyzmetiniń jaýapty qyzmetkerleri men áskeri qyzmetshilerin jaýapqa tartýmen shektelýge bolmaidy. Máseleniń tamyry tereń.
Birinshiden, 1998 jylǵa deiin shekara áskeri kúzetken Qytai Halyq Respýblikasymen aradaǵy memlekettik shekaranyń uzyndyǵy 1783 kilometr bolǵan jáne ony 20 myńnan astam shekarashy kúzetken.
Qazir kúzetiletin memlekettik shekaranyń uzyndyǵy 8,5 esege jýyq ulǵaiyp, 15132 kilometrge jetken. Ony 30 myńnan astam shekarashy kúzetedi. Sondyqtan da, eń aldymen, shekarashylar sanyn kóbeitý qajet.
Óitkeni memlekettik shekarany kúzetetin, kelisimshart boiynsha əskeri qyzmet ótkerip júrgen əskeri qyzmetshilerdiń sany jetkiliksiz bolǵandyqtan, merzimdi áskeri qyzmetke shaqyrylǵan jas sarbazdardy da shekarany kúzetýge tartýǵa týra kelip otyr. Al olardyń tájiribesizdiginen ártúrli shalaǵailyqtar oryn alyp jatady.
Ekinshiden, shekarashylardyń turaqtamaýshylyǵy joǵary.
2018 jyly kelisimshart boiynsha qyzmet etken 1037 sarbaz ben serjant qyzmetten bosatylǵan. Al 2019 jyldyń ótken 10 aiynda 759 sarbaz ben serjant qyzmetten ketken.
Munyń sebebin surastyrsam, shekarashylardyń jalaqysy óte tómen bolyp shyqty.
Eldiń shetinde, jeldiń ótinde memlekettik shekarany kúzetip júrgen sarbazdyń qolyna tietin jalaqysy – 78 myń teńge ǵana.
Kelisimshart boiynsha shekara kúzetetin sarbazdar sanynyń jetkiliksizdiginiń basty sebebi de osynda.
Osyǵan orai, búgin Premer-Ministrdiń atyna hat joldap, memlekettik shekarany kúzetýde kelisimshart boiynsha əskeri qyzmet ótkeretin əskeri qyzmetshilerdiń sanyn kóbeitý jáne olardyń jalaqasyn arttyrý máselesin qaraýyn suradym.
Káribai Musyrman,
Májilis depýtaty
