Elbasy saıtynyń keltirgen málimetinshe, otyrys barysynda Qarýly Kúshterdi, basqa da áskerler men áskerı qurylymdardy 2030 jylǵa deıin qurý jáne damytý tujyrymdamasynyń jobasy qaralyp, sondaı-aq shekaralyq qaýipsizdikti qamtamasyz etý máseleleri talqylandy.
Nursultan Nazarbaev qazirgi jaǵdaıdaǵy áskerı qurylym men Qarýly Kúshterdiń konfıgýrasıasynda jańa tásilderdi ázirleý qajettiligin atap ótti.
Biz barlyq kórshimen berik dostyq qarym-qatynas jáne jetekshi derjavalarmen berik áriptestik ornattyq. Sonymen qatar myqty ásker – el qaýipsizdiginiń mańyzdy kepili, - dedi Qaýipsizdik Keńesiniń tóraǵasy.
Elbasy búginde asımetrıalyq jáne gıbrıdti qaterlerdi toıtarýǵa daıyndyq, jańa tehnologıalardy engizý jáne áskerı prosesterdi basqarýdy avtomattandyrý mańyzdy mánge ıe bolyp otyrǵanyn málimdedi.
Bizdiń Qarýly Kúshterimiz egemendik pen aýmaqtyq tutastyqty, ulttyq múddelerdi qorǵaýǵa qabiletti bolýy kerek. Osynyń bári taıaýdaǵy onjyldyqta áskerdi damytýdy josparlaý kezinde eskerilýi tıis, - dep tapsyrdy Nursultan Nazarbaev.
Qaýipsizdik Keńesiniń tóraǵasy shekara qaýipsizdigin qamtamasyz etý mindetin sheshý Shekara qyzmetiniń jumysyn jáne shekarany qorǵaý ádisterin jetildirýdi ǵana emes, sondaı-aq ekonomıkalyq, aqparattyq, qoǵamdyq jáne áskerı qaýipsizdik baǵyttaryna baılanysty júıeli sharalardy talap etetinin atap ótti.
– Shekarany qaýip-qaterdiń barlyq túrlerinen senimdi túrde qorǵaýdy qamtamasyz etý qajet. Shekara qyzmeti men Qarýly Kúshterdiń qurylymy úndestirilip, biryńǵaı standarttar boıynsha júrgizilýi tıis. Sonymen qatar biz shekara qaýipsizdigi máselesin keshendi, júıeli túrde qaraýymyz kerek, - dedi Nursultan Nazarbaev.
Sondaı-aq, eldiń aýmaqtyq-keńistik damýynyń basymdyqtary shekaralyq qaýipsizdikti qamtamasyz etý jónindegi mindettermen sáıkes kelýi tıis.
...
Buǵan deıin "Pervyı kanal" telearnasyndaǵy "Bolshaıa ıgra" baǵdarlamasynda sóılegen Reseı parlamentiniń bilim jáne ǵylym komıtetiniń jetekshisi Nıkonov "Qazaqstan aýmaǵy – Reseıdiń bergen úlken syıy" dep málimdegen. Naqtyraq aıtqanda:
"Qazaqstan bolǵan joq, Soltústik Qazaqstanda buryn múlde halyq qonystanbaǵan edi. Olar bolǵan, biraq ońtústikke jaqyn. Shyn máninde, Qazaqstan terıtorıasy - Reseı men Keńes Odaǵynyń úlken syılyǵy", - degen edi Reseı saıasatkeri.
Osyǵan baılanysty Qazaqstannyń Syrtqy ister mınıstrligi Reseı Federasıasynyń Qazaqstandaǵy ýaqytsha senimdi ókili Aleksandr Komarovty shaqyryp, narazylyq notasyn tapsyrǵan.
"Keıbir reseılik saıasatkerlerdiń Qazaqstanǵa qatysty arandatýshylyq áreketteriniń jıilep ketýi memleketterimiz arasyndaǵy odaqtastyq qatynastarǵa aıtarlyqtaı nuqsan keltiretini atap ótildi. SİM Reseı tarapynyń mundaı málimdemelerge tıisti baǵa berýin kútedi jáne Reseı Federasıasynyń memleket qaıratkerlerinen mundaı málimdemelerge jol bermeý úshin sharalar qabyldaýǵa shaqyrady" dep jazylǵan SİM taratqan aqparatta.
Reseılik depýtat Vácheslav Nıkonovtyń sózi qazaqstandyqtardy da beı-jaı qaldyrmady. Júzdegen adam depýtattyń Instagram-daǵy paraqshasynda pikir qaldyrdy.
Keıin depýtat Vácheslav Nıkonov Qazaqstan halqyna "ystyq yqylas" bildiretinin aıtty.
