Qazaqstandaǵy shekara beketterindegi uzyn-sonar kezek pen keptelisti azaitý úshin ótkizý pýnktteriniń aldynda arnaiy kútý aimaqtary men avtoturaqtar salynady, dep habarlaidy Dalanews.kz.
Kólik ministrliginiń málimetinshe, jańa jobada shekara mańynda keminde 200 júk kóligine arnalǵan turaq oryndary qarastyrylady. Bul aimaqtar kólik aǵynyn rettep, júrgizýshilerge qolaily jaǵdai jasaýǵa baǵyttalǵan.
Ministrlik servis aimaqtaryn uiymdastyrýǵa arnalǵan arnaiy talaptar ázirlegen. Josparlaý barysynda jerdiń ornalasýy, shekara beketiniń ótkizý múmkindigi, kólik qozǵalysynyń qarqyny, jer bederi men aýa raiy eskerilmek.
Jobaǵa sáikes, kútý aimaqtary birneshe bólikten turady. Onda júk jáne jeńil kólikterge arnalǵan bólek turaq oryndary, elektrondy kezek júiesi, júrgizýshilerge qyzmet kórsetý oryndary, sondai-aq memlekettik organdar men operatorlarǵa arnalǵan ákimshilik bólimder ornalastyrylady.
Budan bólek, aýmaqtar kólik nómirin avtomatty túrde taný júiesimen, baqylaý qurylǵylarymen, internet jáne bailanys jelisimen jabdyqtalady.
Ministrlik bul bastama shekaradaǵy keptelisti azaityp, kólik qozǵalysyn júieleýge múmkindik beredi dep otyr.
