Qazaqtar aýyzbashar berýdi dastarhan básekesine aınaldyryp jiberdi. Bul týraly kópshilik arasynda "tıktoker-ımam" atalyp ketken Nurlan Baıjigituly «Almaty aqshamy» gazetine bergen suhbatynda aıtypty, dep habarlaıdy Dalanews.kz.

Imamnyń aıtýynsha, aýyzashardyń negizgi máni – qarapaıymdylyqta, berekeli dastarhanda, adamdardyń shynaıy yqylas-peıilinde jatyr.

Alaıda sońǵy kezde aýyzashar berý baılyq pen áleýmettik mártebeni kórsetýdiń bir quralyna aınalǵan.

"Biz aýyzashardy jarysqa aınaldyryp jiberdik. Bir kúni maǵan bir oblystyń ákimi habarlasyp, "700 adamǵa aýyzashar jasaımyn" dedi. Men odan: "Sizge jarnama kerek pe?" dep suradym. Ol "joq, kerek emes" dedi.

Bizde aýyzashar bergen sheneýnikterdi orynsyz dáripteý, maqtaý ádetke aınalǵan. Sonda halyqty bir ret tamaqqa shaqyrmasa, olar ashtan qatyp qalatyn sıaqty. Shyn máninde, halyq bul aýyzasharǵa qarap otyrǵan joq. Sondyqtan mundaı is-sharany maqtanysh ne básekege aınaldyrý durys emes. Aýyzashardyń máni – shynaıy yqylasta", – deıdi ımam.

Nurlan ımam sondaı-aq aýyzashar berý úshin halyqtyń qaryzǵa nemese nesıege batyp jatqanyna alańdaıtynyn jetkizdi.

"Bir qaryzdy jabamyn dep, ekinshi qaryzdy moıynǵa ilýdiń eshqandaı jaqsylyǵy joq. Hadıste de: "aýyzasharǵa bir jutym sý men qurma bolsa da jetkilikti" dep aıtylady. Aýyzashardyń berekesi dastarhannyń moldyǵynda emes, adamnyń shynaıy nıetinde", – dedi ol.

Imamnyń sózinen túsinetinimiz, Ramazan aıynda as ta tók dastarhan emes, qarapaıymdylyq, shynaıy yqylas jáne ımandylyq aldyńǵy orynǵa shyǵýy tıis. Bul qazaq halqynyń tól qundylyqtarymen tolyq úılesetin kózqaras.